SUPERBALITA CEBU

‘Gikuhaan’ og dila, mata

GI-CHOP-CHOP. Mao kini ang hulagway ni Angelie Lopez, 37, nga gi-post sa iyang igsuon sa social media samtang naghangyo sa paspas nga pagpairog sa kaso sa linuog nga pagpatay sa iyang igsuon. (Tampo nga hulagway)

SAKIT alang sa pamilya ni Angelie Lopez Kintanar kay gawas nga gi-chop-chop ang iyang lawas, gikuhaan pa og dila ug usa ka mata.

Ila kini nakaplagan dihang giandam ang lawas ni Angelie, 37, aron ilubong sa sementeryong publiko sa Barangay Olivo, Tabuelan niadtong Abril 11, 2021.

Mao kini ang gibutyag ni Analou Lopez, maguwang ni Angelie, sa chat sa Superbalita Cebu sa Mayo 17, 2021.

Ang mga parte sa lawas ni Angelie nakaplagan sa managlahing mga dapit ug petsa niadtong Oktubre 2020 sa Dakbayan sa Sugbo ug Mandaue.

Matod ni Analou Lopez nga kuwang usab og bukton ug bitiis ang lawas sa iyang igsuon, apan bisan pa niini, ila kining gilubong taliwa sa kasakit sa ilang dughan sa linuog nga pagpatay.

Sa pag-ila sa iyang igsuon, unang nigawas ang dental records niadtong unang semana sa Enero 2021 nga nitukma sa nakuhang ulo gikan sa wharf sa Mandaue.

Sa ikaduha o ikatulong semana sa Enero, nigawas usab ang resulta sa DNA test nga nagkompirmar nga iya ni Angelie ang body parts.

Ang gikuhaan og sample mao ang duha nila ka mga igsuon, di ang anak nga babaye ni Angelie, hinungdan nga di 100 percent match ang resulta.

Alang kang Analou, di angay nga mahiagum sa linuog nga pagpatay si Angelie, kinsa iyang gihulagway nga buotan ug kugihan.

“Angie as a sister is kugihan mangitag paagi makakuwarta..mamaligya bisag unsa makaon sa eskwelahan. Naay prinsipyo iyaha. Di magsalig ni bisan kinsa.

Maningkamot mobarog og iyahang kaugalingon,” matod ni Analou sa iyang text message.

MISSING

Niasoy si Analou sa phone interview sa Superbalita Cebu sa Mayo 16, 2021, nga nianang Oktubre 18, 2020, nitambong pa og party si Angelie.

Nianang adlawan, naka greet pa ni sa ilang igsuong lalake nga nag-birthday.

“October 18 birthday sa 3rd sibling namo si Kuya Ruel Lopez. Ni greet pa siya sa GC og happy birthday. Wala na man mi tapoktapok ato kay pandemic man,” nagkanayon si Analou, kinsa nibarog nga private complainant.

Sa lawom nang gabii ug aron paglikay nga madakpan sa curfew, gihatod og sakyanan sa iyang mga kauban si Angelie, apan nagpa drop ra sa eskina sa karsada padung sa condominium nga ilang gipuy-an sa Barangay Tipolo, Dakbayan sa Mandaue.

Human niadto, wa na nila igkita si Angelie ug wa na say mga post ug chat sa social media nga di naandan, matod ni Analou.

Mao usab kini ang asoy sa laing babaye nga higala ni Angelie nga kauban niya sa grupong Dr. Martens, mahalon nga brand sa sapatos.

Wa silay gidudahan gilayon kon di, ang ilang bayaw nga si Harold Kintanar.

Una, kanunay mag-away ang magtiyon ug may mga higayon nga magdapatay. “Kada mag-away ana nilang duha, magdapatay. Usahay mogamit og hait.

Buwag-uli na sila,” nagkanayon si Analo.

Niadtong Septiyembre 18, 2018, gidakop ug gipriso sa makadiyot si Harold sa pulis tungod sa giingong pagpanapat sa iyang igsuon ug gipasakaan og kaso.

Nahibung usab sila nga gihuptan ni Harold ang cell phone sa iyang igsuon nga di man kini limtanon.

Ila usab nga nasayran nga ang 12-anyos nga anak babaye didto gipakatug ni Harold sa higala niining Indian national nga naa sa pikas building nagpuyo ug sa ikaupat na ka adlaw gikuha ang anak.

Makapahibung usab nila nga ang bana nitaho sa kapulisan mga lima ka adlaw na human mawala si Angelie.

NANGHIMAKAK

Si Kintanar, sa iyang counter affidavit nga nakuha sa Superbalita Cebu, nanghimakak nga siya ang nipatay sa iyang asawa.

Matod niya nga mugna ra kini sa pamilyang Lopez, labina ni Analou, nga sukad sa wa pa sila makasal ni Angelie, wa na makauyon kanila.

“When my wife and I got married in Capitol on March 10, 2009, none of the siblings of my wife attended because they do not like me from the very start,” nagkanayon si Harold.

Giangkon ni Harold nga dunay kasong kalapasan sa Republic Act 9262 kun “Anti-Violence Against Women and Their Children Act of 2004” nga gipasaka si

Angelie batok kaniya niadtong 2018 ug pending pa sa korte.

Matod niya nga di kini makiangayon nga ipataban sa kasong parricide.

Iya usab nga gihimakak nga iyang gihuptan ang cell phone sa iyang asawa.

“There was also no proof that the cellular phones of my wife was with me and I vehemently deny the same as I do not have the cellular phones of my wife,” dugang ni Harol sa iyang affidavit.

Iyang gihulagway nga haguka ang mga ebidensya batok kaniya kay puro kini circumstantial ug nga ang “affidavits of the witnesses attached to the complaint does not prove that I am the one responsible for the death of my wife.” (REV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph