Tungod sa nagkaduol na nga piliay sa Mayo 9, 2022, ang mga sakop sa PDP-Laban, nga maoy haring partido sa administrasyon Duterte nagsugod na og tukmoray sa usa’g usa labina ni Sen. Manny Pacquiao, nga maoy presidente kunohay sa PDP-Laban, nga nagpasabot na nga modagan pagka presidente sa sunod tuig.
Ngan nga presidente sa PDP-Laban, si Senador Pacquiao makahibawo unta sa mga kalihokan sa iyang Partido. Apan sa miaging higayon wala masayod si Pacquiao sa gipalakaw nga petisyon ni Energy Secretary Alfonso Cusi nga padaganon si Presidente Digong Duterte nga bise presidente ni Senador Bong Go, nga maoy gituboy nga kandidato pagka presidente sa partido.
Nangasaba si Pacquiao sa iyang kauban sa PDP-Laban kay gililong kaniya ang petisyon alang sa kandidatora sa pagka bise presidente ni Presidente Duterte. Apan karon bag-ohay lang, si Pacquiao na ang gitirahan sa iyang kauban sa Partido tungod sa iyang gisulti sa publiko nga kuwang ang aksyon ni Presidente Duterte sa isyu sa West Philippine Sea ug ang pagdumala sa Covid-19 pandemic.
Senador Manny, morag mohumok ang imong “Pambansang Kamao” ani nga isyu da. Imo man gud gisayo og pahibawo ang imong ambisyon nga modagan ka pagka presidente. Tan-awa, di giunay ka sa imong kauban sa partido kay makig-atbang man ka ni Davao city Mayor Sara Duterte-Carpio, anak sa presidente ug modagan ubos sa iyang partido nga “Hugpong ng Pagbabago”. Bisan tuod nangulipas si Mayor Sara nga di siya modagan pagka presidente sa sunod tuig apan matud sa akong mga paryente sa Mindanao nga napuno na og tarpaulin nga “Run Sara Run” ang dalan sa mga siyudad sa Mindanao.
Dako og purohan nga matangtang si Senador Pacquaio nga sakop sa PDP-Lapan tungod kay bisan siya ang presidente sa PDP-Laban karon apan kontrolado man gihapon sa administrasyon ang mga sakop sa partido. Maayo pa nga motiwalag na lang daan ka Senador Pacquiao sa PDP-Laban karon samtang nga di ka pa ideklarar nga “persona non grata” sa mayores nga sakop sa PDP-Laban.
Kon wa ko masayop, ang primero nga Partido ni Pacquiao sa unang higayon nga misulod siya sa pulitika mao ang Liberal Party (LP) niadtong panahon nga si kanhi Manila mayor Lito Atienza pa ang presidente sa LP. Tungod kay taga Mindanao man si Pacquiao miuban siya sa PDP-Laban, nga maoy Partido ni Presidente Duterte.
Gibaniog nga kanhi senador Bongbong Marcos (BBM) ang posible nga kandidato pagka bise presidente ni Pacquiao kon modayon siya og dagan.te. Matud pa sa usa ka kasaligan nga tinubdan, si BBM dili makig-atbang ni Mayor Sara Duterte sa kumbati pagka presidente. Kon desidido si Pacquiao modagan pagka presidente bisan kon si Mayor Sara ang iyang kaatbang, dako og purohan nga mobalhin siya sa Nationalista Party (NP), nga maoy partido ni BBM.
Kulba-hinam ang piliay sa pagka presidente sunog tuig kay ang modagan si Mayor Sara man. Ang Bong Go pagka presidente nga propaganda ug si Presidente Duterte ang magbise usa ka drama lang, matud pa sa akong tinubdan.