Editoryal: Nganong hinay?

editorial cartoon ni ariel itumay
editorial cartoon ni ariel itumay

Niadto ra diayng Enero 2021 nailhan nga ang lawas nga gi-chop chop iya ni Angelie Lopez Kintanar. Niadtong hinapos sa Oktubre 2020, nakaplagan ang nagkadaiyang parte sa lawas ni Angelie sa Barangay Talamban, Dakbayan sa Sugbo ug wharf sa Mandaue City.

Dentals records, fingerprint ug DNA ang gigamit sa mga pulis sa pag-ila nga ang mga parte sa lawas iya ni Angelie.

Nakamugna og kagubot ang pagkakaplag sa mga parte sa lawas sa tawo kay bisan mismo ang mga pulis, nagtuo nga usa ra ang tag-iya sa lawas, kamot, tiil ug ulo. Gituohan usab nga babaye ang tag-iya tungod sa tag-as nga buhok ug nagpa blonde.

Apan kahibulongan kaayo kay wa ipahibawo sa kapulisan ang kalamboan sa kaso. Niadto pa tuod sa Enero 2021 nailhan ang tag-iya, apan hinay ang pag-irog sa kaso nga gipasaka sa kapulisan. Niadtong Pebrero 18 napasaka ang kaso, apan hangtod ning higayuna, naghuwat pa ang pamilya kanus-a kini maduso ngadto sa korte.

Kahibulongan usab nga gihilom kini sa kapulisan nga unta, usa man kini ka dako nga krimen nga dunay interest ang publiko. Grabe ang pagpatay. Linuog kaayo kay gawas nga gipatay, gipamutol pa ang mga parte sa lawas. Klaro nga dunay kasuko ang killer ug motago sa krimen pinaagi sa paglabay niini sa nagkadaiyang dapit. Nasagmuyo ang pamilyang Lopez sa kahinay sa dagan sa kaso. Nagdugang kini sa kasakit nga ilang gibati nga naglubong sila sa lawas ni

Angelie nga di kompleto kay wa makit-i ang ubang bahin.

Matod sa pamilya, gibauran pa sila sa di pagsulti sa media kalabot sa kaso. Kon unsa ang ilang katuyoan, ang kapulisan ra ang nasayod. Maayo unta kon gipaspasan sa prosecutor ang paghikay sa kaso, sa ingon mataral dayon sa hukmanan ang suspek.

Di ba, naa may giingon nga justice delayed is justice denied. Ang kalangay sa hustiya, usa ka paghikaw niini. Hinaut pang makab-ot ang hustisya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph