Batang nalumos napalgan sa Coast Guard, rescuers

ORMOC CITY--Nakit-an na sa mga sakop sa Philippine Coast Guard (PCG) uban sa rescuers gikan sa Palompon ug Ormoc ang bata nga nalumos sa Albuera, Leyte niadtong Mayo 12, 2021.

Ang bata giila nga si Eila Dylie Bantasan, 3 anyos.

Base sa report sa Albuera Municipal Disaster Risk Reduction and Management (MDRRM), niadto sa dagat ang bata ug iyang iyaan kauban ang ig-agaw nga si Cedric.

Wa kabantay ang iyaan nga namilegro na ang kinabuhi sa duha ka bata nga nagduwa-duwa, naluwas sa iyaan si Cedric.

Dali nga gi-report sa barangay ang insidente ug gipaabot sa Albuera MDRRMO.

Niresponde usab ang mga sakop sa Philippine Coast Guard, Ormoc Divers Club ug Ormoc City Disaster Risk Reduction Management.

Nianang gabii nila gisugdan ang pagpangita apan pakyas.

Sa sunod nga adlaw, sayo gisugdan ang pagpangita pero wala gihapon kini napalgi.

Sa Mayo 14 sa gabii, nakadawat og impormasyon ang rescuers nga dunay nakakita sa bata sa Macario, Merida, Leyte hinungdan nga girespondehan sa rescuers apan wa gihapon makit-i.

Pagka Sabado, Mayo 15, dunay nakakita sa patayng lawas sa bata nga naglutaw lutaw sa kadagatan sa Barangay Buenavista, Palompon Leyte.

Gisusi sa mga sakop sa PCG, kapulisan ug Palompon Municipal Disaster Risk Reduction Management (MDRRM) office ug nakompirmar nga mao ang bata nga nalumos.

Wa dalia pagkuha ang bata gumikan sa kahumok na sa lawas .

Gidala na pagbalik sa Albuera ang bata ug gilusad ang imbestigasyon. (JKDP)

Related Stories

No stories found.
SunStar Publishing Inc.
www.sunstar.com.ph