Nunot sa kamandoan sa Inter Agency Task Force (IATF) nga ilakip na sa priority list ang mga mayor ug gobernador sa pagbakuna human sa medical frontliners, si Lapu-Lapu City Mayor Junard Chan nipahibalo nga magpabakuna ning semanaha batok sa coronavirus disease 2019 (Covid-19).
Sumala sa mayor, hayan sa magpabakuna siya karong adlawa, Mayo 18, o Mayo 19, Miyerkules, apan mag-agad siya sa kondisyon sa iyang lawas ug sa sugyot sa kadagkuan sa City Health Office.
Gibutyag sa mayor nga posibleng Sinovac ang iyang ipaturok sanglit mao kini ang available sa pagkakaron sa kagamhanan.
Kung way mausab sa schedule, hayan magpakuna ang mayor sa Gun-ob Elementary School nga vaccination site.
Si Chan una nang nipadayag niadtong Marso 2021 nga maoy unang magpabakuna batok sa Covid-19 agi ug pagpakita sa mga Oponganon sa kaluwas niini.
Apan wala lang una kini madayon gumikan kay wala malakip ang public officials sama sa mayor sa priority list uban ang senior citizens ug medical frontliners sa bakunahan.
“Pagpakita nato nga so far sa paggamit sa Sinovac wa ta kadungog nga dunay nadisgrasya dunay kakulian so mas preferred ko Sinovac,” matod ni Chan.
Kagahapon, Mayo 17, nibalik na usab ug pamakuna ang kagamhanan sa senior citizens human makadawat og 7,600 ka mga dose sa AstraZeneca gikan sa Department of Health (DOH) 7.
Gisugdan na usab sa kagamhanan ang libreng sakay sa senior citizens gamit ang mga tricycle nga giabangan sa kagamhanan padulong sa duha ka vaccination sites sa dakbayan aron wala gayuy rason nga kaadto sa venue ang senior citizens gumikan sa problema sa masakyan.
Ang duha ka vaccination sites sa dakbayan mao ang Gun-ob Elementary School ug Barangay Agus Gymnasium. (GCM)