Giangkon sa chairman sa Vaccine Board sa Dakbayan sa Mandaue nga hinay ang pagpamakuna ug wala makaabot sa ilang target nga 1,000 matag adlaw, niadtong Mayo 17, 2021.
Ang Mandaue adunay nadawat nga 22,700 doses sa AstraZeneca samtang 1,170 doses sa Pfizer.
Sigon ni Manatad nga wala silay nasugatan nga problema sa pagpamakuna niadtong Mayo 17, gawas sa 40 porsyento lang sa ilang target ang ilang nabakunahan. Nakabakuna sila og 385 ka indibidwal diin lakip sa Priority A1 (medical frontliners) ug A2 (senior citizens), sigon sa nakuhang datos ni Manatad sa vaccination teams.
Ang mga indibidwal nga nabakunahan sa Mandaue City Cultural and Sports Complex niadtong Mayo 17, gikan sa Barangay Bakilid, Tipolo, Subangdaku, Casuntingan, Banilad, Cabancalan, Alang-Alang, IBabao-Estancia, Cambaro, Looc, Guizo, Centro, Mantuyong, ug Barangay Maguikay.
Ang gibakuna nga mga bakuna mao ang bag-ong alokasyon sa AstraZeneca.
Samtang, ang Pfizer wala una gitira sigon ni Manatad tungod kinahanglan pa nila nga siguradohon nga ang mahatagan sa maong bakuna final na nga maturok tungod adunay limit sa oras ang pagbakuna sa Pfizer kung maablihan na kini.
Ang usa ka vial sa Pfizer adunay unom ka doses.
Sa laing bahin, sugod sa Mayo 18, gamiton na sa dakbayan ang bag-ong building sa University of Cebu Lapu-Lapu Mandaue branch (UCLM) isip vaccination post alang Barangay Tawason, Casili, Cubacub, Canduman, Pagsabungan, Tabok, Tingub, Jagobiao, Basak, Labogon, Paknaan, Umapad, ug Opao.
Giinspeksyon na nilang Manatad kauban sa mga miyembro sa Vaccine board lakip sab ang staff sa UCLM niadtong Mayo 17 aron masuta kung andam na ba kining gamiton isip vaccination post.
Tungod ang bakunahan sa UCLM mga senior citizen ug nahiluna ang vaccination post sa ikaduhang andana, sigon ni Manatad nga giandam sab sa tunghaan ang ilang elevator.
Gawas sa UCLM, gilaraw sab sa Vaccine Board nga gamiton ang kanhi North Bus Terminal isip laing vaccination post.
Ang Vicente Gullas Memorial Hospital nga himoong vaccination post. (KFD)