COTABATO CITY -- Giingong nalibog ang katawhan sa Talitay, Maguindanao kon kinsay ilang sundon gumikan sa pagbaton og duha ka mga mayor.
Alang sa Bangsamoro Region, ang legal nga mayor mao si Vice Mayor Moner Sabal apan sa kagamhanang probinsiyal sa Maguindanao, ang mayor sa Talitay mao si Association of Barangay Council (ABC) president Fahad Midtimbang.
Si Midtimbang maoy gitudlo ni Maguindanao Governor Bai Mariam Sangki Mangudadatu nga mohulip sa nabakanteng posisyon sa mayor.
Apan naputos kini og kontrobersiya gumikan sa giingong paglapas sa "law of succession."
Ang elected mayor sa lungsod niadtong 2019 mao si Allan Sabal ug ang vice mayor mao si Montasir Sabal.
Apan si Allan Sabal o Abdul Wahab Sabal napatay sa pagpamusil sa riding-in-tandem atubangan sa usa ka hotel didto sa Malate District sa Manila niadtong Pebrero 10, 2020.
Gumikan bakante na ang posisyon, si Vice Mayor Montasir ang milingkod isip mayor ug ang numero unong municipal councilor nga si Moner Sabal maoy nagsilbing acting vice mayor.
Apan miluwat sa katungdanan si Montasir niadtong Marso 19, 2021, hinungdan nga subay sa "law of succession," si Moner ang mohulip nga mayor.
Mayo 11, 2021, gitudlo ni Mangudadatu si Midtimbang isip caretaker mayor.
Apan niadtong Mayo 12, 2021 nagpagawas og certificate of recognition si Interior Minister Naguib Sinarimbo sa Bangsamoro Autonomous Region in Muslim Mindanao (Barmm) nga miila kang Moner nga mayor base sa "law of succession".
Apan matud ni Maguindanao Provincial Administrator Odjie Balaymman nga wala na nag-function isip mayor si Moner, hinungdan nga ang certificate of recognition nga gipagawas sa Barmm wa nay gahum. (Edgar E. Fuerzas)