Alang kang Los Angeles Lakers superstar LeBron James, ang pambatong pointguard sa Golden State Warriors nga si Stephen Curry maoy angayan nga mahimong MVP sa 2020-21 season sa National Basketball Association (NBA).
Gitumbok ni James ang nahimo ni Curry sa puwersa sa Warriors maoy iyang gibasihan sa pagbuhi niya ning iyang opinyon.
Nakimpang og maayo ang puwersa sa Warriors human mibiya si All-Star Kevin Durant sa ilang kiliran ug mitapon sa Brooklyn Nets unya naangol ang pares ni Curry sa Splash Brothers nga si Klay Thompson.
Batan-ong mga magduduwa ang kadaghanan nga naglangkob sa Warriors apan taliwala ning tanan, nakalusot gihapon sila sa regular season sa pagpangulo ni Curry.
Ang Warriors ninghuman sa regular season isip No. 8 team sa Western Conference diin ilang ikaharong sa play-in tournament ang puwersa ni James, nga maoy No. 7.
Ning bag-uhay lang, naangkon ni Curry ang iyang ikaduhang NBA scoring title pinaagi sa iyang average nga 32 puntos matag duwa.
Si Curry, kinsa kanhi two-time MVP, mirehistro og 42.1% sa 3-point range ug aduna sab averages nga 5.8 assists, 5.5 rebounds ug 1.2 steals.
“I mean, just look at what he’s done this year,” asoy ni James kabahin kang Curry. “I don’t know anything else if you’re looking for an MVP. If Steph is not on Golden State’s team, what are we looking at? We get caught up in the records sometimes.”
Gitataw ni James, kinsa kanhi four-time MVP, wala siya’y laing nahunahunaan nga makalabaw sa gipakitang duwa ni Curry ning maong season.
“We get caught up in the, ‘OK, who has the best record,’ instead of just saying who had the best season that year. And Steph has had, in my opinion, the best season all year,” dugang ni James.
Ang mga karibal ni Curry sa inilugay sa MVP award mao sila si Denver Nuggets center Nikola Jokic, Philadelphia 76ers center Joel Embiid, Damian Lillard sa Portland Trail Blazers, Chris Paul sa Phoenix Suns ug ang kasamtangang two-time MVP Giannis Antetokounmpo sa Milwaukee Bucks. (AP)