Malisod nga tahas ang sagubangon ni kanhi World Boxing Council (WBC) Silver minimumweight champion Jonathan “Pretty Boy” Almacen sa iyang pagpakigbatok sa kanhi world champion Hekkie “The Hexecutioner” Budler karong Mayo 22, 2021 alang sa bakanteng WBC silver lightfly title sa Booyens Gym sa South Africa.
Si Almacen uban sa iyang trainer nga si kanhi world champion Joma Gamboa Sr. atoa na sa South Africa karon alang sa maong away.
“Maglisod ta og daog kon moabot gyud og round. Kinahanglan gyud ma-knockout nato ang kontra,” matod ni Gamboa atol sa online interview sa Superbalita.
Gawas nga nakapabor sa lugar, si Budler nakabintaha usab sa eksperiyensiya batok sa bagitong si Almacen.
Si Budler adunay 32-4, 10KOs nga baraha samtang ang 21-anyos nga si Almacen naggunit og 7-3-2, 2KOs nga rekord.
Niadtong Septiyembre 16, 2017, si Budler nakaaway sa Waterfront Hotel and Casino-Lahug, Cebu City batok ni Milan Melindo alang sa IBF ug IBO world lightfly title diin siya napildi pinaagi sa split decision.
Katapusang nakaaway si Budler niadtong Disyembre 31, 2018 alang sa WBA super world light fly title sa Wynn Palace sa Cotai, Macao diin siya gi-knockout ni Hiroto Kyuguchi sa Japan.
Si Almacen, kinsa lumad nga taga Muntinlupa City, katapusan usab nga nakasaka sa ring niadtong Mayo 22, 2019 ug midaog pinaagi sa unanimous decision batok ni Roldan Sasan.
Naangkon ni Almacen ang WBC Asian Boxing Council Silver minimumweight title human niya mapukan si Xiang Li sa China pinaagi sa unanimous decision niadtong 2018. (JBM)