Dear Atty. Joan,
Ako si Boy, 35. Niadtong Disyembre 2018, nagbuwag nami sa akong asawa. Duna mi duha ka anak nga nagpangedaron og 18 anyos ug 15 anyos. Kasado kami sa huwes niadtong tuig 2003.
Niuli na ko sa among probinsiya human kami nga nagbuwag. Padayon ko nga naghatag og sustento alang sa akong mga bata.
Gusto na unta ko musulod og laing relasyon apan dunay nagtambag nako nga dili kini mahimo kay basin mapasakahan ko og kaso.
Hinuon, nagkasinabot mi sa akong asawa nga dili lang mi maghilabtanay sa mga lakaw sa among mga kinabuhi. Gani interesado ako nga magpahimo og kasabutan sa papel kabahin ini.
Posible ba ang maong kasabutan? Kon mahimo kini, pila kaha ang bayad?
Kana lang usa, Atty Joan. Salamat kaayo ug more power sa CLB.
Imong magtatampo,
Boy
Dear Boy,
Una sa tanan maayong adlaw usab kanimo diha Boy. Salamat sa imong pagsunod niining lindog.
Sakto ang nagtambag nimo Boy nga dili ka mahimong mosulod og relasyon samtang minyo pa ka sa imong pares. Posibleng makiha ka og Concubinage ubos sa Revised Penal Code o paglapas sa Anti-Violence Against Women and Their Children (Anti-VAWC) Law kon mapamatud-an nga nakigrelasyon ka og lain samtang wala pa ma-dissolve ang kaminyuon nimo.
Maayo pod nga padayon ka sa pagsuporta sa imong mga bata. Kadaghanan sa mga reklamo nga madawat namo diri sa CLB mao ang kakuwang sa child support alang sa mga pamilyang nagbuwag. Usa ka maayong ehemplo ang imong binuhatan, Boy.
Apan sayop ang imong sugyot nga isulat sa papel ang kasabutan nga dili na kamo maghilabtanay sa imong asawa sa mga personal nga lakaw ninyo. Dili kini ‘legally binding’ o nagpasabot nga wala kiniy ngipon sa mata sa balaod. Gani, dunay mga hukom ang Korte Suprema kabahin sa maong sitwasyon ug consistent kini sa pagpahinumdom nga dili mahimo matugutan ang maong kasabutan kay iligal kini.
Ang angay buhaton nimo Boy mao ang padayon nga pagkonsulta sa mga abogado kabahin sa imong sitwasyon. Posible nga mo-file ka og mga civil cases sama sa legal separation ug nullity of marriage apil na niini nga mahimong basehan ang ‘psychological incapacity’ sa pagwagtang sa inyong kaminyuon.
Sa laktud, kinahanglan sundon nato Boy ang mga lakang nga gilatid sa balaod sa pagputol sa kaminyuon. Dili kita pwede nga mphimo og mga shortcut nga walay basehan sa balaud.
Daghang salamat, Boy, sa imong sulat tampo. Hinaut nga nalamdagan ka karon.
Imong alagad,
Atty. Joan
[Lindog sinuwat ni Atty Joan Saniel-Amit, Executive Director inubanan sa mga abogado sa Children’s Legal Bureau sama nilang Atty. Jenny Vieve Cabradilla ug Atty. King Anthony Perez. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]