Nasikop sa kapulisan ang usa ka giingong notadong drug pusher sa buy-bust sa Sitio Tambis, Brgy. Pooc, Dakbayan sa Talisay sa Mayo 17, 2021.
Ang suspek giilang si Lorna Reponte Zabalande, 41, taga Purok Narra, Brgy. Tuyan, Dakbayan sa Naga.
Matod sa kapulisan nga dugay na nga gipanid-an si Zabalande, kinsa usa ka high value individual.
Nakuha gikan kang Zabalande ang 25.3 ka gramo sa shabu nga mobalor og P172,040.
Si Police Lieutenant Colonel Gerald Ace Pelare, hepe sa Talisay Police Station, nagkanayon nga ang pagdakop kang Zebalande mensahi alang sa mga nalambigit sa ginadiling drugas aron muhunong na sila sa ilang illegal nga negusyo.
Ang Talisay dunay dakong suliran sa illegal drugs sud sa daghang katuigan, apan sa subsob nga kampanya, natibhangan og dako ang illegal nga negusyo.
Si Zabalande nabalhog sa Talisay City Police Station ug pasakaan og kasong kalapasan sa Republic Act 9165 o Comprehensive Dangerous Drug Act of 2002. (JDS)