Nisaka na ngadto sa 36 gikan sa 80 ka barangay sa Dakbayan sa Sugbo ang wa nay pagpanakod sa coronavirus disease (Covid)-19 sa nakalabay nga 10 ka mga adlaw.
Base sa uwahing data gikan sa Emergency Operations Center (EOC), 278 na lang ka aktibong kaso sa Covid-19 ang giatiman sa mga health care worker sa Cebu City gikan sa 44 ka barangays, 25 niini gikan sa Guadalupe.
Ang nagsunod nga barangay mao ang Lahug nga adunay 18, Camputhaw ug Mabolo adunay tag 12 nga maoy top 4 barangays nga adunay tag 2-digit nga kaso.
Ang ikalima mao ang Tisa ug Banilad nga adunay walo ka aktibong mga kaso samtang ang ubang mga barangay adunay usa ngadto sa pito na lang ka mga kaso sa nakalabay nga 10 ka adlaw.
Si Konsehal Joel Garganera, deputy chief implementer sa EOC, padayon nga niawhag sa publiko nga di mokumpyansa ug ipadayon ang naandan nga gimbuhaton sa pagsunod sa mga health protocol.
Base sa talaan sa EOC, niabot na og 23,814 ang kinatibuk-ang mga kaso sa Covid-19, samtang 22,814 ang nangaayo, 860 ang nangamatay.
Ang critical care utilization rate anaa nalang sa 19% gikan sa 15 ka public ug private hospitals sa dakbayan diin gikan sa 872 total beds para Covid-19 patients, 166 ra ang okupado.
Si Mayor Edgardo Labella nagpasalamat sa katawhan gumikan sa ilang pagsunod sa basic health protocol.
Siya subling nipahimangno sa mga Sugbuanon nga di moluag sa pagmatngon batok sa virus.
Iyang giawhag ang mga business establishment owner nga nagtanyag og ilimnon nga makahubog sa pagsunod sa protocol ug pagbadlong sa ilang kauban nga mga establisemento sa higayon nga mosupak sa lagda. (PAC)