Tungod nagpabilin gihapon sa modified general community quarantine (MGCQ) ang tibuok Lalawigan sa Sugbo, gihangyo sa Hunta Probinsyal nga ibalik na ang sports activities sa mga kalungsoran ubos sa pagsunod sa minimum health standards.
Si Bokal John Ismael Borgonia niduso og resolusyon atol sa sesyon sa Hunta Probinsiyal nga naghangyo sa Regional Inter-Agency Task force (RIATF) nga ibalik na sa sports activities sa kalungsoran.
Pahayag ni Borgonia, mao na lang kini ang naghatag og lingaw o recreational activity alang sa mga batan-on nga kapin sa usa ka tuig na nga gilimitahan ang paggawas sa panimalay gumikan sa pandemiya.
“Ang usa sa rason niini kay at least recreation man gud ni siya gud unya pinakalibre nga recreation namong mga batan-on so mao ni angay na pod nga physical activities sports pa at least maka-exercise pod,” matod ni Borgonia.
Subay sa labing uwahing kamandoan ni Cebu Governor Gwendolyn Garcia gitugot ang mga non-contact sports pasabot kadtong mga duwa nga dili magsingkiay o magkaduol.
Apan matod ni Borgonia nga pipila sa mga kalungsoran ang mitugot na sa pagbalik sa paugnat sa kusog sama sa basketball ug volleyball apan gikinahanglan nga padayong ipatuman ang health protocol. (ANV)