Ang Philippine Red Cross sa Lapu-Lapu Cordova chapter andam mohatag og mobile bus nga vaccination site alang sa nagpadayong pagpamakuna sa kagamhanan batok sa coronavirus disease 2019 (Covid-19).
Kagahapon, Mayo 18, 2021, ang Red Cross sa pakigtambayayong sa Ultimate Bus UB Express mibisita sa City Health Office aron magpa-accredit kalabot sa ilang gamitong bus alang sa pagpamakuna.
Matod ni Cyril Dwight Alegado sa Red Cross Lapu-Lapu Cordova chapter nga mahinungdanon ang ilang gitanyag sa kagamhanan sanglit makatabang sila sa paghatag og kasayon niadtong magpabakuna.
Ang kagamhanan ra ang mohatag nila og bakuna ug sila lang ang mopahigayon niini sa mga kabarangayan.
“In every barangay moadto ta didto para sa bakuna naa sad ni siya manpower composed of one doctor and nurses para mo-vaccinate and then naa tay mga volunteers nga motabang after vaccination kay mag-wait pa man mga 30 minutes,” pasabot ni Alegado.
Si Dr. Agnes Realiza, pangulo sa City Health Office sa dakbayan, mibutyag nga makatabang ang tanyag sa organisasyon.
Apan alang kaniya mas maayong adto na kini nila e-deploy sa pagpamakuna sa mga essential worker apan dili health workers sama sa mga vendors ug uban pa.
Gumikan kay anaa naman ang mga vaccination sites sa pagkakaron alang sa mga senior citizens ug medical frontliners.
Posibleng sa katapusan na Hunyo kini mahitabo ug sa merkado publiko sa dakbayan ipahimutang aron kahataga og kasayon ang magpabakuna.
Nakauyon ra usab ang City Health Office sa setup sa Bus nga haom ra usab alang sa vaccination.
“We are asking the owner ug another bus probably ing-ani nga space kanang dakodako og capacity for the post vaccination,” matod ni Realiza. (GCM)