SUGOD karong adlawa, QR code tickets ug tap cards na ang gamiton sa mga pasahero nga mosulod sa Cebu South Bus Terminal (CSBT) kini subay sa pagpatuman sa centralized automated ticketing system sa terminal.
Pinangulohan ni Cebu Governor Gwendolyn Garcia, pormal na nga gilusad sa kagamhanan sa lalawigan sa Sugbo ang bag-ong sistema sa CSBT Martes, Mayo 18, 2021, human sa pipila ka buwan nga gihimong dry run ug konsultasyon.
Sa bag-ong sistema adunay duha ka paagi nga mahimong pili-an aron makasulod sa terminal.
Una ang pagpalit og reloadable Suroy Suroy tap cards sa loading station nga tag P100.
Kon walay tap card mahimo usab nga mopalit og QR code tickets sa ticketing station.
Ang matag ticket dunay codes nga i-tap sa bay aron makasulod sa waiting area.
Tinguha sa kagamhanan nga cashless ang transaction sulod sa terminal, paagi nga malikay sa pagtakboy sa bisan unsang kagaw ilabi na sa coronavirus disease (Covid-19).
Hinungdan nga nalakip na sa mabayran sa ticket o card ang plitehan sa bus apan, magdepende ang mabayran sa ticket sa gilay-on sa destinasyon sa pasahero. Atol sa grand launching sa terminal, si Cebu Governor Gwendolyn Garcia nagkanayon nga dugay na niyang gihandom ang maong kalamboan.
Dugang niya nga ang bag-ong sistema sa terminal maoy timaan sa padayon nga pagbangon sa lalawigan sa Sugbo taliwa sa nasinati nga pandemya ug krisis sa nasud.
Kahinumdoman nga ang Topline Hi-Tech Synergy Corporation maoy gi-awardan sa kapitolyo nga mo-modernize sa terminal. Misulod usab og kasabotan ang di mo menos sa 30 ka mga bus operators sa terminal tali sa Topline alang sa pag adopt sa maong sistema.
Matod ni Carmen Quijano nga subay sa bag-ong paagi, dili na lisod alang sa mga pasahero ang paglinya ug matuman usab ang pag physical distancing.
“What we did kay mag monitor lang pod mi ug unsay angay namong ikatampo. Makita nato nga bag-o paman so by and by ang mga pasahero magkat-on ra gyud kay naa may mo assist unsay buhaton,” matod ni Quijano.