Patay ang usa plumber human mi-ambak sa ika-19 nga andana sa padayong gitukod nga condominium building nga nahimutang sa 13th Avenue, Bbarangay Tejero, Cebu City niadtong Mayo 18 sa buntag.
Ang namatay gi-ila nga si Emilio Laraga Mapalo Jr. alyas Jun-Jun, 20 nga taga-San Franciso isla sa Camotes, Lalawigan sa Sugbo kinsa kawani sa sa Trade Constructor company.
Sigun sa nakasaksi nga si Noel Luchavez 46, nga taga-lungsod sa Compostela nga maoy leadman sa Trade
Constructor nga samtang nagtrabaho na sila sa ibabaw nagambo sa ubos si Mapalo.
Gibadlong pa kini sa iyang mga kauban nga dili magpadaplin kay basin mahagbong apan sa dihang giduol na sa usa sa mga kauban midagan na hinuon kini dayon ambak.
Wala na na mahitsura ang panagway ni Mapalo human mahagsa ang lawas sa pavement sa building. Matod ni Police Major Edgar Labe, hepe sa Waterfront Police Station nga sigun sa tabi-tabi sa mga kaubanan nga daghan kini og problema may kalabutan sa trabaho ug sa personal nga kinabuhi.
Niadtong miaging adlaw maghinuktok lang ingon sa way gana motrabaho. Walay nakitang foul play ang mga imbestigador sa kamatayon sa biktima.
NANAMILIT
Gisusi ang cellular phone sa biktima ug didto ilang nakita ang text message nga iyang gipadala sa iyaan niini ingon sa nanamilit.
Natala sa maong text: “Teya pakisabi kay mama mga kapatid ko mahal ko kayung lahat patina sila lola i miss you, pag amping mo palagi ha.”
Nasayod na usab ang mga kabanay ni Mapalo lakip na ang iyaan nga maoy iyang gi padalhan sa mensahe sa text sa iyang gidangatan.
Dugang ni Major Labe nga ila kining sutaon og unsay dakong problema nga gidala-dala sa biktima nganong nakahimo sa pagkutlo sa iyang kinabuhi.