MAAYONG adlaw, mga Supersuki.
Ato usa nga timbayaon ang usa sa atong follower, sender # 0920******9 nga nagpadala sa iyang opinyon kalabot sa atong isyu nga "Mindanao, yuta sa saad" niadtong nakalabay nga semana.
Mangayo ko'g dispensa nga dili nato mapadayag sa publiko ang imong opinion kay makaaghat sa kasuko sa uban nga grupo.
Init karon ang isyu sa West Philippine Sea (WPS) kay naugkat ang mga misteryo nga nahitabo ubos sa kanhi administrasyon ni President Benigno Aquino III nganong mibiya ang mga sundalo gikan sa standoff sa Scarborough Shoal samtang ang mga barko sa China mipabilin hangtud karon.
Gibutyag ni kanhi Senate President Juan Ponce Enrile ang iyang nahibaloan uban sa paghagit kang kanhi Senador Antonio Trillanes IV nga ibutyag ang nahimong kasabutan sa iyang "backdoor negotiation" sa gobyerno sa China.
Igo ra miingon si Trillanes nga maayo ang resulta sa iyang pakig-negosasyon apan wala kini mihatag og dugang detalye. Hinuon iyang giakusahan si Enrile ug Pangulong Rodrigo Duterte nga nagkunsabo aron magbuhat-buhat og istorya batok niya.
Sumala sa pagtuon, adunahan sa natural gas ug lana ang WPS ug gituohan nga dako ang ikatabang sa pagpakunhod sa kalisud sa mga Pinoy kon mapanghimuslan unta ang mga minerales ug magamit sa mga Pinoy.
Gituohan nga dunay 4.6-trillion cubic feet nga deposito sa Recto Bank, 80 nautical miles ang gilay-on gikan sa Palawan nga mapahimuslan natong mga Pinoy sulod sa baynte (20) anyos.
Gibana-bana sa United States Energy Information Administration nga dunay 55.1 trillion cubic feet sa natural gas ug 5.4 billion barrels sa lana, (oil) sa Reed Bank sa Spratly Islands hinungdan nga mas nadasig ang China pagkontrola sa WPS.
Kon kaisog ang ipatigbabaw sa mga Pinoy aron solohon kining mga resources diha sa WPS, dakong giyera para sa ato ang atong sagubangon apan "peanut" lang para sa China kay kanding kontra sa elepante ang tapad kon mahitabo.
Maalaut kita, mangamatay nga posibleng dili makatilaw unsay lami nga ikahatag nianang gas ug oil deposit sa WPS apil pa ang mosunod nga henerasyon.
Ang pagpakighigala sa gobyerno sa China ang mas maayo nga opsiyon, sugyot ni Enrile tungod walay maayo nga sangputanan kon magpa-isog-isog ta. Dili sab ta makasalig nga tabangan sa United Nations kay wala man gani gipugos sa America nga motuman ang China sa kasabutan nga mohawa ang ilang mga barko sa nahitabo nga standoff human nibiya ang barko sa mga sundalong Pinoy.
Init ug gigamit nga isyu sa mga oposisyon aron bitaron paubos ang administrasyon ni President Digong.
Alang sa inyong pag-aninaw ug opinyon, ipadala sa 09478143026.