Sa unang 15 ka mga adlaw sa Mayo, 2021, ang Cebu City Transportation Office (CCTO) nakaisyu og 7,441 ka traffic citation tickets ngadto sa mga drayber nga nakalapas sa balaud sa trapiko.
Sagad sa mga kalapasan mao ang disregarding traffic signs (DTS), way registration ug lisensya ang drayber, expired ang registration ug uban pa.
Duna usab silay na impound nga 261 ka mga motorsiklo, 59 ka electric bikes, 27 ka mga traysikol, siyam ka dumptrucks ug 13 ka pribadong mga sakyanan.
Duna usab silay 349 ka mga sakyanan nga na-clamp tungod sa overnight parking sa mga karsada.
Gihingusgan usab sa CCTO ang pagpanakop sa mga e-bike nga namasahero sa mga karsada sa downtown sa Cebu City tungod sa kadaghan sa mga reklamo nga naabot sa ilang buhatan.
Sa buntag sa Huwebes, Mayo 20, ang mga enforcer nakadakop og pito ka e-bikes ug walo ka mga motorsiklo gikan sa dan Magallanes padung sa Barangay Duljo Fatima.
Niadtong Mayo 18, nakasikop usab sila og 14 ka e-bikes, siyam ka mga traysikol ug duha ka mga traysikad.
Ang ilang pagpanakop gihimo sa may Inayawan landfill, dan Magallanes ug Dimasalang.
“Daghang reklamo nga among nadawat mahitungod aning walay mga rehistro nga traysikol ug mosugat nga mga e-bike nga lagmit makadisgrasya ug risgo sa mga pasahero nga sakay niini,” pagpasabot sa CCTO sa ilang gipahigayong hugot nga operasyon. (REV)