COTABATO CITY -- Nakabalik na sa ilang mga balay ang kinatibuk-ang ihap sa mga namakwit didto sa Datu Paglas, Maguindanao Province human ang pag-atake sa mga teroristang Bangsamoro Islamic Freedom Fighters (BIFF).
Kini ang gikompirma ni Municipal Disaster Risk Reduction and Management Office (MDRRMO) Officer Boy Tocao.
Nakadawat sab ang mga pamilya nga naapektuhan sa kagubot og hinabang gikan sa lokal nga panggamhanan sa Datu Paglas ug kagamhanang probinsiyal.
Gawas sa LGU-Maguindanao, nakahatag sab og relief goods ang kagamhanan sa Bangsamoro Autonomous Region in Muslim Mindanao (Barmm).
Samtang kadtong mga bakwit nga mihikling padulong sa North Cotabato ang nakadawat og hinabang gikan sa Barmm ug LGU-Cotabato.
Sa pikas bahin, naghangyo si Tocao sa katawhan sa lungsod nga dili dayon motuo sa mikatag nga taho nga subling mangatake ang BIFF tungod kay kontrolado sa militar ug kapulisan ang sitwasiyon.
Kahinumdoman nga gisulong sa BIFF nga gipangulohan ni Solaiman Tudon, alyas Kumander Abu Jihad, sa BIFF-Karialan faction ang merkado publiko sa Datu Paglas apan naabog dayon kini sa mga awtoridad. (Edgar E. Fuerzas)