Jesson Morata
Nagsuwat/Hulagway
Niining pagminus sa kaso sa Covid ang atong mga opisyal sa dakbayan sa Sugbo pinaagi sa Tourism office, milusad og Highland Bloom and Ecotourism nga proyekto.
Tumong niini ang pagbuhi sa industriya sa turismo sa kabukiran sa siyudad.
Nasayran adunay dili momenos 10 ka mga barangay nga nahimutang sa bukirang bahin sa dakbayan sa Sugbo nga naglangkob sa Busay, Tagbao, Malubog, Sirao, ug uban pa.
Tungod sa kalimitado sa pagbiyahe pagawas sa lalawigan sa Sugbo,usa sa mga popular kaayo nga dagsaon sa mga tawo karon ang Transcentral Highway o mas naila sa tawag nga TCH.
Pipila la tuig ang milabay, naila ang lugar nga tinubdan sa mga bulak ug mga lagutmon.
Apan tungod sa pagkatay sa kalambuan ug panginahanglanon sa mga tawo ug mga resort ug parke nga sayong adtuon ug duol sa kinaiyahan.
Usa sa mga bag-ong maanindot nga mamahimong kasuroyan layo sa kasaba sa siyuda agi sa TCH mao ang - Lakeview Le Jardin.
BOTANICAL GARDEN
Ang Lakeview Le Jardin mao ang bag-ong tanaman nga botanical nga nahimutang sa Sityo Inaad, Barangay Tabunan, Cebu City.
Usa ka makapahingangha nga talan-awon sa mga nagkadaiyang matang sa tanom sa nagkadaiyang kolor nga naghatag og dugang kaanyag sa palibot.
Bag-o lang kining gibuksan niadtong buwan Marso 2021.
Sigurado nga makapa-ukyab sa mga plantita ug plantito ang maong lugar.
Ang industriya sa turismo sa Cebu nag-uswag ug dili nato ikalimod ang kamatuoran nga ang mga namulak nga tanaman nga nagkatag sa tibuok nga Trans Central highway nakadani sa daghang mga turista matag tuig.
Siguro, nakita na nimo ang among mga higala nga nagpasundayag sa ilang matahum nga mga hulagway pinaagi sa social media nga adunay mga backdrop gikan sa Sirao Flower Garden, Terrazas del Flores, Buwakan ni Alejandra, Evo Nature Camp ug uban pa.
Ang Lakeview Le Jardin usa ka bag-ong lugar nga dili kamahayan sa higayon nga inyong masuroyan ug daghang “Instagrammable” spots.
Dili ma-anugo ang pagsuroy sa maong lugar gawas sa paghanggap og preskong hangin, kahumot sa buwak, ang lunhaw nga talan-awon sa lugar ug kasikbit niining dapit nga bukid.
Sa uban naandan ang pagbisita sa mga baybayon uban sa mga higala o pamilya, suwayi ang botanical garden sa Lakeview Le Jardin nga usa usab ka epektibo nga paagi aron mapalig-on ang relasyon sa pamilya, hinigugma ug uban pa.
Gawas pa paagi sab kini sa paghatag og bili sa atong kinaiyahan.
UNSAY NAA?
Di lang usa ka lapad nga hardin ang Lakeview Le Jardin kay aduna sab kiniy restaurant.
Ayaw sipyata sa pagtilaw sa ilang burgers, pizza, cold drinks ug uban pa.
Ang nakanindot mao ang desinyo sa ilang kan-anan maghatag og komportable nga panan-aw ug adunay mga elemento sa horticultural nga makahupay sa panan-aw sa palibot.
Masud-ong sab sa maong lugar ang Malubog Lake nga nahimutang sa Barangay General Climaco, Toledo City.
UNSAON PAG-ADTO?
Sa kadtong way pribadong sakyanan nga buot mosuroy sa lugar mamahimong mo-hire og habal-habal nga manukad sa JY Square sa Barangay Lahug, Cebu City ug kana-og sa Charlie’s Cup.
Mamahimo sab nga mosakay og V-Hire nga mobiyahe paingon sa Balamban, Asturias og Tuburan diha sa terminal sa Ayala Center Cebu ug kana-og gihapon sa Charlie’s Cup.
RATE / SKEDYUL
Adunay entrance fee nga P100 (hamtong), P50 (8 yrs. old paubos.
Bukas ang Lakeview gikan sa 9:00 sa buntag ngadto na sa 5:00 sa hapon gikan sa adlawng Miyerkules ngadto na sa Lunes.
Alang sa dugang pangutana ug uban pang inpormasyon mamahimong mo-email: lakeviewlejardincebu@gmail.com, o ang pagsubay sa Facebook page nga https://www.facebook.com/lakeviewlejardincebu/.