LTO, CCTO miimbestigar sa nag-wheelie sa motor

Nameligro nga maisyohan og temporary operator’s permit (TOP) ang mga motorista nga nag-wheelie atubangan sa Kapitolyo sa Osmeña Boulevard nga nakuhaan og video, usa kanila natulimbang.

Si Regional Director Victor Caindec sa Land Transportation Office (LTO) 7 maoy ni-post sa video sa social media nga kuha sa usa ka netizen atol sa ilang pag-exhibition og drive sa public road.

“Gusto gyud diay sila mosikat. Pakpakan nato uy. Salamat sa nag video. We now have leads to members of this group,” tipik sa post ni Caindec.

Si Caindec nihatag na og direktiba sa iyang mga sakop sa pagpakigtambayayong sa mga hingtungdan nga ahensiya para sa paspas nga aksyon ug mapatubag ang mga sakop sa grupo sa ilang gibuhat.

“I have directed the LTO7 Operations Division to coordinate with CCTO, HPG 7 (Highway Patrol Group and PNP PRO7 (Police Regional Office) and issue show-cause orders to these club members. We will give them a chance to explain (ayaw mo reklamo, due process na. Di ra ba kamo motubag og kasohan mi),” dugang sa post ni Caindec.

Gawas sa ilang pag-stunt sa Kapitolyo, nag-wheelie usab ang samang mga motorista sa dalan Colon, ilawom sa tunnel sa Cebu South Coastal Road, South Road Properties nga nakuhaan usab og pictures.

Ang wheelie sa motorsiklo maisip nga reckless driving kon naa sa major nga mga karsada.

NAKALAPAS

Ang Cebu City Transportation Office (CCTO) pinangulohan ni Lyntoni Alburo nipadayag usab nga daghan sa mga traffic laws ilawom sa Cebu City Ordinance ang nalapas sa maong mga motorista.

“Gikondena sa CCTO ang kini nga mga lihok ug gusto nga tawagan ang atensyon sa kini nga grupo. Sa among inisyal nga imbestigasyon ang ubang mga kalapasan nga nahimo,” tipik sa Facebook post sa CCTO.

Ang gipasabot nga kalapasan mao ang pagmaneho nga way plaka sa sakyanan, pagsulud sa “one way” nga dalan (San Jose Street), pagmaneho sa “no motorcycle allowed lane” (CSCR viaduct), speed ​​contest o exhibition nga kalapasa ubos sa City Ordinance 801 kun Cebu City Traffic Coder, Art. VII Sec. 10 ug pagsunud og maayo samtang nagmaneho sa ilawom sa kalapasan gihapon sa ordinansa sa Siyudad.

Ang CCTO nanawagan sa publiko kinsa makakuha og video sama sa gibuhat sa wa pa matino nga mga ngalan sa riders ug ang club diin sila mga miyembro sa pag-report sa ilang buhatan o pag-send ngadto sa ilang messenger sa CCTO.