NAGPAABOT na og pasiunang hinabang ang kagamhanang probinsiyal sa Sultan Kudarat sa mga naapektuhan sa pagbaha sa pito ka mga barangay sa Lambayong sa nahisgutang probinsiya.
Samtang padayon ang ilang pag-andam og dugang ayuda sa mga bakwit nga naa sa mga evacuation centers.
Nasayran nga nagpatuman og "force evacuation" ang Municipal Disaster Risk Reduction and Management Office (MDRRMO) sa nahisgutang lungsod tungod sa grabeng pagbaha.
Pito ka mga barangay nga grabeng gibahaan mao ang Tinumigues, Pinguiaman, Matiompong, Madanding, Kabulakan, Sadsalan ug Udtong.
Matud ni Lambayong Municipal Administrator Engineer Roelle Aradanas nga milibot ang ilang Quick Response Team sa MDRRMO sa mga nahisgutang barangay aron luwason ang mga natanggong mga molupyo.
Gikanayon nga ang nasinatian nga pagbaha nunot sa makusog nga pag-ulan nga maoy hinungdan nga miawas ang Ala River ug milunop sa lungsod.
Padayon ang rapid damage assessment sa MDRRMO sa mga nahisgutang barangay.
Gawas sa mga barangay sa Lambayong, gibaha sab ang mga ubos nga bahin sa probinsiya sa North Cotabato ug Maguindanao.
(Edgar E. Fuerzas)