Sayo ning semana, nadapit ang pagtagad sa mga tawo nga naglinya sa gawas sa gawas sa simbahan sa Barangay Poblacion Pardo. Nahibulong ko nganong nagbitbit sila og mga basiyong plastic sa mineral water ug softdrink. Gisubay nako kong asa padulong ang taas nga kutay sa mga tawo. Sa sulod diay sa open court sa Holy Rosary School of Pardo ang ilang puntarya diin nagpaabot ang mga batan-on nga naghan-ay sa mga gi-repack nga bugas ug ubang pagkaon.
Nasayran nako gikan kang Sangguniang Kabataan (SK) Councilor Lovely Java nga ang SK diay sa Poblacion Pardo pinangulohan sa ilang SK Chairman Honey June Caro, nagpasiugda og community pantry ning panahon sa pandemya. Ang nakanindot kay inay maghayon lang ang gustong makapahimulos, kinahanglan nga magbitbit sila og plastic nga basiyo sa mineral water ug softdrink. Bugti kini sa bugas. noodles, sardinas ug ubang pagkaon nga ilang madala sa balay.
Gituyo ni aron sa pagpaminos sa nagka dako nato nga problema sa mga plastic nga maoy nag-unang rason ngano barado ang atong mga kanal ug kasapaan. Ang tulo ka pladtic sa 1.5 liter nga mineral water ug softdrink maoy bayloan sa mga pagkaon nga giandam sa SK. Nindot ni nga paagi ug angayan nga ipatuman sa ubang mga dapit nga padayon nga nanghatag og pagkaon pinaagi sa ilang community pantry.
Atong saludohan ang SK sa Barangay Poblacion Pardo ning ilang bayanihong buhat. Kumusta man ang SK sa ubang barangay? Kumpleto pa ba mo? Naa pa bay nagtikaw tikaw diha? Panahon ni nga inyong ipakita ang inyong katakus nga taliwala sa inyong kabatan-on may matampo kamo sa pagpaarang-arang sa kahimtang sa inyong mga tagi barangay.
Ang lain sab nakong nahuna hunaan nga inyong pasiugdahan mao ang pagbisita sa mga tinun-an sa ilang mga panimalay. Kumustahon sila kong naunsa na ang ilang pagkabutang. Mas maayo man gani unta madad-an sila og mga pagkaon nga sarang makalipay nila ning panahon sa pandemya. Samot na kong magdala mo og load para sa ilang cellphone alang niadtong naka online class.
Ambot og nganong nakalimtan sa gobyerno pagtunol og ayuda sa atong mga tinun-an? Diha man gani koy sugyot nga wala pa gyud maimplementar pagpabuhi pagbalik sa recess nga subra na sa tuig nga wala na kapahimusli sa mga tinun-an. Simpol ra kaayo ang paagi.
Sa survey maihap pila ka tinun-an sa usa ka sitio. Ang organizer mag-andam og pagkaon. Sa oras sa recess bagtingon ang kampana nga bitayon sa usa ka sitio. Ipatuman ang social distancing pag-apod-apod sa snacks. Para dako kaayo og kahulugan ang recess sa kinabuhi sa mga bata sa elementarya ug high school. Kini nga paagi magpahinumdum nila sa ka importante sa recess sa ilang pag-eskwela.
Matod pa sa usa ka higala pangpakalma ni sa stress ug anxiety nga gibati sa mga bata ning panahon sa pandemiya sa Covid-19.