Kadtong duha ka lalake nga gipanawagan sa social media nga na missing niadtong Martes sa gabii, Mayo 18, 2021 napalgan na kini apan nadakpan diay sila sa kapulisan sa Siyudad sa Sugbo atol sa buy bust niadtong Huwebes, Mayo 20., usa ka adlaw human sila nga wala makauli sa ilang panimalay.
Ang mga ginikanan nila ni Rhyjy Naingue, 24, ug Leoneree Evangelista, 25, pulos taga Villagonzalo 1, Barangay Tejero, Siyudad sa Sugbo nangayo og tabang tungod sa missing nilang sakop sa pamilya.
Katapusan sila nga nakit-an sa didto sa Dakbayan sa Mandaue, pasado alas 9:00 sa gabii niadtong Martes.
Apan pagka Huwebes sa alas 6:30 sa gabii, Mayo 20, ang mga sakop sa City Drug Enforcement Unit sa Cebu City Police Office (CCPO) midakop nilang Naingue ug Evangelista sa Banawa, Barangay Guadalupe, siyudad sa Sugbo atol sa buy bust.
Ang duha nakuhaan og mga pinakete sa gituohang shabu nga mobalor ang tanan og P20,000.
Matod ni Police Lieutenant Colonel Wilbert Parilla, deputy city director for operation sa CCPO, ang duha mga drug couriers, mokuha sa supply sa illegal nga druga ug ila kining ihatod sa mopalit niini bugti sa suhol kanila.
Giingong moabot sa usa ka buwan nga gi-monitor ang lihok sa duha ug sa dihang na nakakuha silag impormasyon nga nakadawat silag supply, gilusad dayon ang operasyon apan gamay nalang ang nakuha nga druga tungod sa posibilidad nga nabaligya na ang uban.
“During sa among pag conduct sa investigation nasayran sa among operatives nga they are couriers, sila ni ang mo-transact and then sila ang mo deliver,” matod ni Parilla.
Gihimakak ni Parilla nga sila ang hinungdan sa pagka-missing sa duha niadtong Martes sanglit ila na lang kini nga nakatransaksiyon nianang gabii sa Banawa.
Matod niya nga wala na sila masayod kung asa niadto ang duha ka dinakpan sa wala pa ang anti-illegal drug operation.
Pasalig ni Parilla sa publiko nga ang kapulisan sa dakbayan naghimo sa ilang trabaho ilabi na ang paghingusog sa kampanya batok sa illegal nga druga.
Adunay gihatag nga mga pangalan ang mga dinakpan nga ilang supplier sa illegal nga drugas nga mao na usab ang sunod nga target sa followup operation sa kapulisan.