HUMAN wala makapakita og aksiyon sa VisMin Super Cup Visayas leg, ang Sugboanon ug kanhi PBA player nga si Eloy Poligrates modala sa iyang abilidad sa Zamboanga Del Sur alang sa umaabot nga Mindanao leg ning bag-ong natukod nga professional basketball league sa nasod.
Si Poligrates, uban sa laing duha ka mga Sugboanon nga sila si Russel Moneva ug Charles Pepito, gipaabot nga maoy mangulo sa Alayon Zamboanga Del Sur.
Dili lisod alang sa tulo ang pagdala sa team sanglit ubos kini sa pagdumala ni Rodolfo “Bong” Abad, ang kanhi headcoach sa University of San Carlos Warriors, ug Bong Pineda, kanhi asst. coach sa University of San Jose Recoletos (USJ-R) Jaguars.
Ang 6-3 nga Poligrates, lumad nga taga Camotes Island, Cebu, nakaduwa sa Talk N Text sa PBA ug ingon man ka usa nahimong most valuable player (MVP) sa D League ubos sa Marinerong Pilipino. Atoa na usab siya sa Mindanao.
“Yes, one month na mi nga nagpraktis diri sa Pagadian City Siyempre, as a coach ang goal is going to the top. I try my best to compete in every game. Kahit lang ang preparation,” matod ni Abad atol sa online interview sa Superbalita.
Gihulagway ni Abad nga ang siyam ka mga teams sa Mindanao pulos gyud adunay katakos ug alang kaniya kon kinsa ang anaa sa saktong preparasyon maoy dakog bintaha.
“Tanan is competitive, so magdaog lang ni sa preparation,” dugang ni Abad kinsa sama kang Poligrates, produkto usab sa Southwestern University Cobras.
Si Abad, kinsa nakaduwa og duha ka tuig sa San Miguel Beer sa PBA, nakuhang coach sa Zamboanga Del Sur human girekomendar sa iya ra usab nga higala.
Nalakip usab sa lineup sa Alayon ang pipila ka mga magduduwa sa Maharlika Pilipinas Basketball League (MPBL). Kini sama ni Dan Sara, 5-7, kinsa kanhi pointguard sa Batangas-Tanduay sa MPBL Lakan Cup.
Ang presensiya usab sa kanhi bigman sa San Juan nga si Jeff Tajonera ug ex-Nueva Ecija gunner nga si Aderian Celada makapalawom sa ilang lineup.
Gipaabot nga si Rocky Chan, ang Chief Operations Officer sa VisMin Super Cup mopahibawo sunod semana kon asa ang venue Mindanao leg. (JBM)