Gibalita karon ang umaabot bugno nilang Sen. Manny Pacquiao batok ni Errol Spence karong Agusto 21, 2021.
Matod pa, dili kini sayon nga bugno ni Pacquiao kay 42 anyos na siya ug duha ka tuig nang wala siya motungtong og ring. Ang Spence, sa iyang bahin, 31 anyos, maoy numero uno sa 147 lb division karon.
Naay moingon nga gikinahanglan kining maong away ni Pacquiao kay kuno nagkinahanglan kini og kwarta alang sa iyang kampanya alang sa pagka presidente. Apan alang kanako, kon kwartahay lang, dili problema sa senador ang kwarta.
Duna na kiniy igong pundo ug nasiguro ko nga daghan ang mosuporta kaniya. Gani, sila karon ni Davao City Mayor Inday Sara Duterte ang nag-una sa pagtukod og grassroots organization sa tibuok nasod.
Mas sayon ang kang Sara kay naa na siyay gipananom nga network sugod pa sa miaging eleksyon dihang nisuporta og mga kandidato ang Hugpong ng Pagbabago. Presidente pa gyud ang iyang amahan.
Dayon, daghan pa gyud ang mga DDS nga nisuporta ni Digong sa 2016.
Si Pacquiao, sa iyang bahin, sa miaging tuig lang nagsugod og tukod sa iyang grassroots organization diha sa Manny Pacquiao for Presidente Movement (MPPM). Sa miaging tuig lang usab siya nahimong presidente sa PDP-Laban.
Bisan pa man, usa siya sa frontrunners sa lumba alang sa pagka presidente sa Pilipinas.
Karon, iyang irisgo kini diha sa iyang bugno ibabaw sa ring batok ni Spence.