SUPERBALITA CEBU

2 ka barangay sa siyudad sa Sugbo drug-cleared na

2 ka barangay sa siyudad sa Sugbo drug-cleared na. (File photo)

Sa labing unang higayon, duha ka mga barangay sa siyudad sa Sugbo ang gideklarar sa Regional Oversight Committee on Barangay Drug Clearing (ROCBC) nga drug-cleared.

Sa iyang Facebook page, gipahibalo ni Jona John Rodriguez, pangulo sa Cebu City Office of Substance Abuse Prevention (Cosap) nga ang Barangay Santo Niño sa downtown area ug Barangay Sudlon 1 sa bukirang dapit, nahukman nga walay na kalihokan sa gidiling drugas.

“Mapasigarbuhon ko nga mobalita ninyo nga human sa makuti nga pagsusi sa Regional Oversight Committee on Barangay Drug Clearing ganihang hapon (Mayo 21) sa Bayfront Hotel, gideklarar nga drug-cleared barangay ang Sudlon 1 ug Sto. Niño. First time in the history sa Cebu City nga dunay nadeklarar sa maong status,” tipik sa post ni Rodriguez.

Gipasigarbo usab kini sa Philippine Drug Enforcement Agency (PDEA) 7 ang pagdeklarar nga drug-cleared sa duha ka barangay human nakapasar sa mga rekisitos nga gipangayo sa ROCBC diin ang ilang ahensya maoy nangulo.

Matod ni Leia Alcantara, information officer sa PDEA 7, ilang gikalipay ang maong kalamboan nga bisan sa ka highly urbanized city, ang siyudad sa Sugbo, aduna guy posibilidad nga makadeklarar og usa ka barangay nga drug-cleared basta maningkamot ug magtinabangay lang ang mga ahensiya nga naglangkob niini.

“This is proof nga even in the highly urbanized cities, possible gyud ang barangay drug clearing program basta mokooperar lang gyud ang mga concern agencies particularly kining barangay nato or the barangay anti-drug abuse council (Badac),” matod ni Alcantara.

Gibutyag ni Alcantara nga ang tibuok 80 ka barangay sa siyudad kaniadto apektado gyud kini sa problema sa illegal nga drugas apan human gihingusgan sa kagamhanan sa siyudad ug sa Badac naghinayhinay nag kawagtang ang mga nalambigit sa illegal nga drugas sa ilang tagsa-tagsa ka barangay.

Ang Cosap mihingusog sa barangay community-based drug rehabilitation program diin kadtong drug surrenderers ang seryuso nga nagpa-rehab.

Usa na niini ang Barangay Sudlon 1, diin ang tanang drug personalities nga moabot ngadto sa 98, nipaubos sa maong programa ug sa gihimong monitoring sa barangay officials ug sa mga molupyo, wala nay mitumaw nga tiggamitan sa illegal nga drugas.

Pasabot usab ni Alcantara nga kon adunay madakpan ang kapulisan ug ang ilang ahensya nga nalambigit sa illegal nga drugas sa duha ka barangay nga gi deklara nga drug-cleared, dili kini makaapekto sa ilang standing.

“Actually kanang conduct of anti-illegal drug operation importante na siya for the barangay to maintain if drug- cleared status...,” dugang ni Alcantara.

Aduna pay siyam ka barangay ang posibling madeklarar nga drug-cleared sa dili pa matapos ang 2021 nga gipaubos pa sa deliberation sa ROCBC.

Dako kini nga hagit, matod ni Alcantara, sa ubang mga barangay nga maningkamot nga mahisama sa Santo Niño ug Sudlon nga nakab-ot ang pagka drug-cleared. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph