HUMAN napakyas sa paglabni og otomatikong lingkuranan alang sa Tokyo Olympics, ang Sugboanong skateboarder nga si Margie Didal mobiyahe paingon sa Europe aron ipadayon ang iyang tinguha nga maka-qualify gyud sa matag upat ka tuig nga kompetisyon.
Ang Southeast Asian ug Asian Games gold medalist igo ra milandig sa ika-12 nga puwesto sa semifinals round sa score nga 12.06 sa bag-ong natapos nga Dew Tour Des Moines 2021 nga gipahigayon didto sa Estados Unidos.
Sa maong kompetisyon, ang malakip sa top eight maoy otomatikong mo-qualify sa Olympics.
Hinuon, ang 21-anyos nga garbo sa Sugbo, kansang biyahe giabaga sa Philippine Sports Commission (PSC), nakakuha og dugang nga puntos alang sa iyang Olympic qualifying points nga maoy makapahugot sa iyang paghupot sa ika-14 nga luna sa world street skateboard rankings.
Dako ang tsansa sa lumad nga taga Lahug, Dakbayan sa Sugbo, nga madala tungod kay adto na man usab siya sa Rome, Italy morumbo ug mosalmot sa Street World Championships 2021 nga gikatakda karong Mayo 30 ngadto sa Hunyo 6.
Kon masulod siya sa top three ning kombatiha, diretso na siyang mo-qualify sa Olympics uban nila ni pole-vaulter EJ Obiena, gymnast Caloy Yulo, mga boksidor nga sila si Carlo Paalam, Nesthy Petecio, Irish Magno ug Eumir Marcial, weightlifter nga si Hidilyn Diaz, rower Cris Nievarez ug ning bag-o lang si Kurt Barbosa.
Laing paagi nga mo-qualify si Didal mao nga kinahanglan motapos siya sa top 16 sa world rankings sa di pa moabot ang Hunyo 29. (JBM)