SECTIONS
Superbalita Davao
Tuesday, September 21, 2021
SUPERBALITA DAVAO

Roldan: Tunnel busloton na

Nota Bene

DILI ikalalis nga usa sa legasiya sa administrasyon ni Pangulong Rody Duterte, ang ika-16 nga presidente sa Pilipinas, mao ang iyang Build, Build, Build Program. Sa binisaya pa, Tukod, Tukod, Tukod, usa ka programa sa imprastraktura alang sa Pinoy gikan sa probinsiya sa Batanes ngadto sa Tawi-Tawi. Paghunahuna mo'g proyektong pampublikong imprastraktura di ba nabuhat na karon.

Binilyon nga kuwarta sa gobyerno nga giutang sa mga bangko sa langyaw'ng nasud ang gibubo aron matuman kining mga proyekto. Bisan asa ka molingi adunay proyekto nga gihimo. Tungod sa hilabihang problema sa trapik sa Metro Manila, gipundohan sa gobyerno ang pagtukod og mga "skyways," "overpass," "by-pass roads" ug uban pa. Dunay gipang-ablihan karon nga mga dalan nga makunhod sa inoras nga biyahe ngadto sa minutos na lang. Dinhi sa Davao City makita sab ang daghang proyektong imprastraktura. Apil na dinhi ang pagbutang og mga higanteng "culverts" sa sentro mismo sa siyudad.

Daghang nalipay apan daghan sab ang nabudlay ug nasuko tungod sa kahinay sa pipila ka kontratista. Gipangbuslotan ang dalan nga mora'g walay kahumanan. Apil na niini ang P13 bilyon nga Davao Bulk Water Project nga iya sa Davao City Water District ug Aboitiz Group nga ambot kanus-a mahuman.

Hinuon, tungod sa Covid-19 pandemic, nadelatar ang tanang trabaho. Hasta ang pagtukod sa DITO towers nadugay usab imbis nga daghan na unta kining towers karong tuiga aron mokusog ang signal sa on-line classes sa kabataan. Gibanabanaang 30 porsyento na sab sa "coastal road project" ang nahuman.

Gawas niini, gibalita sa Department of Public Works and Highways nga pagasugdan na karong Hulyo ang pinakataas nga "mountan tunnel" nga may gitas-on nga 2.3 kilometro nga tipik sa 45.5 kilometro nga Davao City Bypass Project nga gipundohan sa Official Development Assistance sa Japan International Cooperation Agency ubos sa Special Terms for Economic Partnership (Step) Loan.

Ang pagbuslot sa bungtod nga may gitas-on nga 8 metros ug gilapdon nga 10 metros sa may Barangay Langub gigamitan og "jumbo drills" gikan sa Japan og Austria. Apil kini sa 10.7-kilometro nga "package" nga trabahuon sa tulo ka kontratista, usa gikan sa lokal ug duha gikan sa Japan sud sa 37 ka bulan.

Kung mahuman na unya ang maong mga proyekto, makaingon gayud kita nga niabot na ang "pagbabago" nga gisaad kanato ni PRody.

Dili na unya kita maghuot sa mga "bottle neck areas" sama sa Ulas, Matina, Quirino, Bajada, Buhangin, Panacan nga makapaaburido sa mga drayber ug magsasakay.

Gawas sa benepisyo sa paspas nga pagbiyahe, aduna say makat-onan nga bag-ong kahanas ang atong mga trabahante sa bag-ong teknolohiya sa konstruksyon nga dala sa mga langyaw'ng kontratista.

Mosulod dinhi ang teknolohiya sa pagbangag og bungtod ug ang gitawag nga "Austrian tunneling method" o "sprayed concrete lining method."

Mosulod sab ang Shimizu Corporation ug Takenaka Civil Engineering and Construction Company sa Japan nga magdala sa ilang teknolohiya ug kahanas nga makatabang sa atong industriya sa konstruksyon.

Busa taas-taasan pa nato ang atong pasensiya kay kining tanan, bisan dili mahuman sa termino ni PRody, masugdan na ug makita sa katawhan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph