Nangusog karon ang kagamhanan nga ang publiko dili mamili og bakuna. Gibuhat kini karon human mas daghan ang nagpunsisok nga magpabakuna og Pfizer didto sa kaulohan. Mingaw man gud kon Sinovac ang itusok.
Sa akong tan-aw, ang mga lakang nga ingon niini makapasamot hinuon sa kakulang sa kumpyansa sa katawhan niining pagbakuna. Makahibulong man gud nganong ipamugos gyud nang Sinovac, ang bakuna nga gikan sa China ug grabing pasalamat ni Presidente Rodrigo Duterte.
Apan, sa ngadto ngadto, lain diay nga bakuna nga gikan og China ang iyang gipa-inject sa iyang kaugalingon. Niadtong tungora, wa pa gyuy pagtugot sa atong Food and Drug Administration (FDA) ang Sinopharm.
Karon, naay balita nga pipila ka nasud di mopasulod sa ilaha kon nabakunahan og Sinovac. Buot ipasabot, looy kaayo ang mga OFW nga naturokan og Sinovac kay dili sila makasulod sa Saudi Arabia pananglit.
Di mahimong dili makahibawo ang mga molarga sa gawas kon unsay klase sa bakuna ang anaa inig pabakuna niya.
Hinuon, alang kanako, alang sa walay planong molarga sa gawas, ok ra kanang Sinovac. Sa akong pangagpas, pareho lang kini ka epektibo sa ubang mga bakuna.
Apan alang sa nanagana batok sa usa ka klase sa variant sa virus sa Covid-19, mas epektibo kuno ang Pfizer ug Astrazeneca.
Matod pa, basi kini sa pagtuon sa mga bag-ong variant sa gawas.
Sa miaging Huwebes, nagpabakuna ko sa Lagtang Gym diri sa Syudad sa Talisay. Tayming nga AstraZeneca ang bakuna nga naa.
Matod pa, usa kini sa isog nga bakuna. Apan buhi pa man ko karong nagsulat niining lindog. Wa say nabalita nga naigo sa grabing side effects. Mura lang gyud noon og nabun-og ang akong tuo nga abaga hangtod karon. Hehehe.
Usbon lang nako og asoy dinhi ang gihisgot sa akong amigo.
Matod pa niya, daghan daw ang nanghadlok dihang nakadesisyon siya og pabakuna labi na nga senior citizen ug daghang mga sakit-sakit.
Bisan pa man, niadto siya sa Lagtang Gym aron mosud-ong lang ug maniid sa pagpamakuna diri sa Syudad sa Talisay.
Apan, dihang nakita niya ang gatusan sa mga senior citizens nga nagpatusok, niingon siya nga kadaghan diay nilang mangasakit kon tinuod ang mga pagpanghadlok. Daw mahurot ang mga tiguwang sa Talisay. Nidiritso siyag linya oi. (DM nako sa @anol_cebu)