DUGANG 147 ka mga kaso sa coronavirus disease (Covid-19) ang natala sa Cagayan de Oro sulod sa duha ka adlaw, usa ang locally stranded individual (LSI) ug 146 ang mga local transmissions.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 6,469.
Sumala ni Acting City Health Officer Dr. Lorraine Nery, sa 146 ka mga bag-ong lokal nga mga kaso, 37 ang mga close contacts sa mga pasyenteng nagpositibo sa coronavirus, 14 ang mga local authorized persons outside residence (Apor), 63 ang mga local index nga mga kaso, unom ang mga Apors with link, 22 ang mga persons deprived of liberty (PDLs), ug upat ang mga patay.
Sa 6,469 nga kinatibuk-ang kaso sa Covid-19 sa syudad, 439 ang mga returning overseas Filipino workers/locally stranded individuals (ROFs/LSIs) ug 6,030 ang mga local transmissions.
Ang Cagayan de Oro adunay 1,006 ka mga active cases, 276 niini na-admit sa Northern Mindanao Medical Center ug uban pang mga ospital sa syudad, ug 730 ang mga outpatients.
Nakatala usab og 96 ka mga Covid-positive nga mga kaso nga karon naka-recover. Anaa na karon sa 5,188 ang ihap sa mga nakarekober nga mga kaso sa dakbayan.
Sa maong numero, 313 ang mga LSIs, 124 ang mga ROFs, ug 4,751 ang mga lokal nga kaso (community: 4,032; Apors: 719).
Ang recovery rate sa Cagayan de Oro miubos na sa 80.19 porsyento.
Ang ihap sa mga namatay sa Covid-19 sa syudad anaa na sa 275.