LUYO sa paningkamot nga mapaubos ang kaso sa Covid-19 sa Davao City, dungan niini nga gilantaw ang posibilidad nga ibalik pag-usab ang paggamit sa Food and Medicine (FM) Pass ning dakbayan.
Lakip nga ibalik mao ang "no movement" matag adlaw nga Dominggo sa paneguro nga bisan sa usa ka adlaw, ang halos tanang tawo naa sud sa panimalay.
"Dako na siya nga possibility," sigun ni Davao City Mayor Sara Duterte-Carpio atol sa Special Hour program sa 87.5 FM Davao City Disaster Radio (DCDR).
Sa milabay nga adlaw, anaa sa sobra usa ka libo ang aktibo nga kaso sa Covid-19, diin samot nga nakapaguol sa mayor mao ang impormasyon nga anaa na sa "critical level" ang kapasidad sa Southern Philippines Medical Center (SPMC).
"We are not comfortable with what is happening sa atong hospitals karon. Makita nato na the moment man gud na mag-abli na ang private hospitals it meant napuno na ang SPMC," sulti sa mayor.
Dugang niya nga labing dako na ang SPMC kung napuno na kini, nagpasabot nga dunay problema.
Gipasabot sa mayor nga di na moisyu og bag-ong FM pass ang lokal nga kagamhanan sa siyudad tungod miisyu na ang buhatan sa bise mayor niini una ang Disyembre 2020.
Hangyo sa mayor sa katawhan aron di na mosikad pa ang daghang kaso sa Covid-19, ipabilin sa kanunay ang pagtuman sa mga health protocols.
"Ang atoa is ang non-pharmaceutical interventions (mask, distancing, staying home), other alternative work areangements, essential activities only," hangyo sa mayor.