Maayong adlaw mga Supersuki. Nia na sab ta sa lain nga isyu karong semanaha.
Daghan ang nasagmuyo sa pamahayag ni President Rodrigo Duterte nga dili mamili ang katawhan unsa ang Covid vaccine nga ibakuna kanila kay pareha lang ang epekto ug libre kini gikan sa gobyerno.
Daghan ang wala makaangay kay daw wala nay pulos ang katungod sa katawhan nga pahibaw-on unsay buhaton sa gobyerno ngadto kanila, unsay iturok sa ilang lawas ug ang mga butang nga nakalatid sa "Right to Information".
Sa kaso ni Valmonte vs. Belmonte Jr., ang Supreme Court nagbutyag sa kaimportante sa katungod nga pahibaluon sa mosunod nga mga pamahayag.
Ang bag-ong pamaagi sa Republican nga sistema sa panggobyerno mao ang pag-deligar sa katawhan sa gahum ngadto sa estado, (State). Niini nga sistema, ang mga ahensiya ug institusyon magapadagan sulod sa gilatid sa gahum nga gitugyan sa katawhan.
Ang paghikaw sa kahibalo sa ginabuhat sa gobyerno, nagabutang sa mga lumolupyo nga mahimong tukbonon, biktima sa kapritso sa mga gitugyanan sa gahum.
Ang ginatudlo sa Constitution sa nasud nga panalipdan ang katawhan gikan sa pagpangabuso sa mga naa sa gahum mamahimong kakawangan kon ihikaw ang katungod sa impormasyon ngadto sa katawhan.
Duna na kitay katungod sa pagpili labi na sa mga vaccine nga ibakuna kanato. Kana kon kita ang mopalit, kita ang mobayad apan dili sab ta makapalit og vaccine kontra sa Covid kay wala pod tay mapalit niini sa mga botika.
Libre ang bakuna kontra Covid-19, hatag kini sa gobyerno sa katawhan.
Ang uban mamili tungod sa pagtuo nga mas epektibo ang usa ka brand kay sa uban.
Nalugaw ang hunahuna sa katawhan tungod sa mga gipakatag nga impormasyon ug mga panghadlok nga daghan ang nakuyapan, nagka-blood clot sa utok tungod epekto sa vaccine.
Dunay uban nagsulti nga duha ka tuig ra ang tagal, mangamatay na ang mga gibakunahan kay mao na ang nakadesinyo nga epekto sa vaccine.
Dili ta maka-demand nga kini nga brand ang ako kay nagadepende ang lokal nga kagamhanan unsa ang gipadala gikan sa itaas.
Duha lang ang opsiyon nga atong mapilian. Modawat sa bakuna o magdumili, nungka nga moingon ka nga kini nga brand ang ihatag sa ako.
Dinhi nga punto, hinaut nga nakatabang ta sa pagpasabot aron matibhangan ang pagbagulbol sa katawhan, apan atong katungod nga mahibalo unsang matang sa vaccine ang iturok sa atong lawas.
Hinuon, atong nasayran nga ginapahibalo sab kini sa mga magapahigayon sa bakuna didto na sa mga vaccination hub.
Laraw sa atong mayor, Sara Duterte-Carpio, nga maproteksiyonan ang katawhan, luwason sa kadaut nga dala sa Covid-19 virus.
Sa atong yano nga pagsabot, wala sa hunahuna sa kagamhanan nga mogasto og dakong kantidad sa kuwarta sa gobyerno, mamalit og vaccine, magpakiluoy sa ubang nasud nga bahinan ta sa vaccine, aron human sa duha ka tuig mangatigbak na ang katawhan.