Basin pa sa subsob karon nga vaccination program sa nagkalain-laing lugar sa nasud, daghan diay gihapon ang nagdumili sa pagpabakuna batok sa Covid-19. Base kini sa survey sa Social Weather Station (SWS) nga gipahigayon niadtong Abril 28 hangtod sa May 2, 2021 nga gipagawas lang niadtong Mayo 20. Sa maong survey, nasuta nga 32 porsiyento lang ang gustong magpabakuna bisan kon libre nga ihatag ngadto kanila. Buot ipasabot nga tulo lang sa napulo ka mga Filipino ang gustong magpabakuna.
Daghang hamtong nga mga Filipino, mga 33 porsiyento ang dili gustong magpabakuna ug 35 per cent ang way klarong baruganan. Ang survey gipahigayon pinaagi sa 1,200 ka mga respondents o ang mga tawo nga gipangutana sa tibuok nasud. Ang percentage niadtong gustong magpabakuna, taas sa Metro Manila nga adunay 41 per cent, dayon sa Mindanao nga adunay 34 per cent ug sa Visayas adunay 32 percent samtang 28 percent sa ubang bahin sa Luzon.
Ang kasagaran nga rason nganong dili sila magpabakuna mao nga nahadlok sila sa epekto ug dili epektibo ang mga bakuna; mahadlok sila nga mamatay kay nakadungog silang adunay nangamatay; wala silay salig sa bakuna; aduna silay sakit ug tiguwang na sila; wala kuno silay sakit ug himsog sila; dili lang gyud sila gusto ug ang uban wala mohatag og rason.
Kasagaran sa magpabakuna mao ang mga college graduate, dayon high school graduate ug kadtong wala makagraduwar. Siguro kining mga tawhana nga nagdumili kuwang lang sa pagpasabot ug impormasyon kabahin sa mga benipisyo nga makuha sa pagpabakuna. Sila maoy angay nga kampanyahan sa kagamhanan aron pagkombensir sa mga tawo nga magpabakuna.
Ang kahadlok ug kabalaka mao ang nag-unang rason nga magdumili ang ubang mga tawo nga magpabakuna. Bisan sa mga gamhanan ug datung mga nasud, mao gihapon kini ang problema sama sa Estados Unidos. Mao kini ang hinungdan nga ang ilang kagamhanan mihatag og bisan unsang insentibo ngadto sa katawhan aron maengganyo ang katawhan sa pagpabakuna. Mao nang dinhi sa ato, angay nga tratahon natog maayo ang mga tawo nga gustong magpabakuna. Dili nato balibaran kon naa sa vaccination centers ug kon puwede, hakuton.