KARONG panahon sa pandemic, sa imong matag lakaw, bation mo ang kahingawa, kabalaka ug kahadlok. Ingon sa matag karon ug unya, dunay kalit mobugno nimo nga maligno. Ang makahahadlok kay di makita ang kaaway.
Kapin na sa usa ka tuig nga ang katawhan nagdala-dala ning mao nga kahadlok, inubanan pa sa mga lockdown ug uban pang mga pagpig-ot nga nagguba sa normal o naandan nato nga lihok.
Karon nga gilugakan na og maayo ang Sugbo, panahon nang moginhawa og lawom, mo-relax gikan sa kakapoy nga pisikal ug huna-huna. Way laing dapit nga maanindot duawon: beach.
Presko ang hangin ug kalami paminawon sa tingog sa mga bawod nga mohawok sa baybayon o molamba sa mga bato sa baybayon. Dunay mga pagtuon sa mga sayantipiko nga nagpakita nga ang “vitamin sea” dunay maayong epekto sa atong panghuna-huna, pinaagi sa atong makita ug madungog.
HIMENSULAN BEACH
Sa Lungsod sa San Francisco, mga isla sa Camotes, dunay barangay nga gigasahan sa Diyos og puti nga baybayon nga bisan naa ka taliwa sa kadagatan nga nag-uwang sa mainland Cebu ug Camotes, imo nang makita ang puti kaayong bas.
Ang nakaanindot, kini nga beach pampubliko, busa libre. Kon gamay ka ra kaayog budget, pamplete ug pagkaon lang ang imong gikinahanglan.
Pagdala og tolda ug gamay nga galamiton sa pagluto kay mahimo ka rang makaandam sa kinaugalingon sa imong pagkaon daplin sa baybayon, ilawom sa mga kahoy ug kalubihan. Naa ra sab sa duol ang balay diin mahimo kang maligo ug motubag sa sugo sa lawas sa bayad nga P2-P10 matag gamit sa matag tawo.
Ang nakalahi sa Himensulan beach sa mas sikat nga Santiago Bay kay duol ra ang tubig sa baybayon kon maghunas. Wa usay daghang komersyal nga mga establisemento busa sa kagabhion, labina sa weekdays, mingaw.
Haum sa imong gipangita nga dapit nga pang-relax. Kon ganahan kang magsud-ong sa kabituonan sa langit, maanindot ang Himensulan beach. Kon ganahan ka og astrophotography, haum kining dapita.
COTTAGE
Dunay pipila ka mga lumolupyo nga nagpaabang og mga payagpayag isip cottage sa tag P300 ug naa say floating cottage nga tag P600. Apan kadaghanan sa mangaligo magdala lang og banig ug gamay nga lamesa, ipahimutang sa ilawom sa mga kahoy, enjoy na kaayo sila.
Kon di ka gusto nga masamok ang imong bakasyon o mga moment, way signal sa cell phone ang dapit. Di ba, mibakasyon ka aron mo-relax, way laing huna-hunaon?
UNSAON PAG-ADTO
Pag book online sa Jomalia Shipping aron way hasol sa paglinya. Tag P220 ra ang ticket gikan sa Danao City padulong sa pantalan sa Consuelo sa San Francisco. Mas maayong roundtrip ang imong booking aron di ka na mahasol sa pag-uli kay dunay higayon nga maputol ang imong internet connection sa isla. Kon two-wheeled nga sakyanan, P602 ang bayran, apil na ang driver.
Sa pag-abot sa Consuelo, dunay mga multicab nga mahimong abangan kon kamo grupo, apan kon ikaw ra o duha mo, naay daghang habalhabal nga modala nimo sa Himensulan.
Kon magdala ka og sakyanan, sama sa motorsiklo, gikan sa Consuelo, naa kini sa mga upat ngadto sa lima ka kilometro ang biyahion. Pangutana lang og direksyon sa mga tawo. Naa sa tuo ang eskina padulong sa beach, diin dunay karatulang dako nga Himensulan Beach.
Huna-hunaa, wa kinahanglanang buk-on mo ang imong bangko sa pagbakasyon. Wa kinahanglana ang five-star hotel accommodation, labina kon ikaw gustong mag-inusara o makigsawo sa imong mahal sa kinabuhi sa panahon nga kamo rang duha nga magsawo sa inyong moment bisan gamay rang budget.
Taliwa sa kamingaw, inyo pang madungog ang pinitik sa inyong tagsa ka kasingkasing samtang maminaw sa lagubo sa mga bawod nga nagbalikbalik sa paghawok sa baybayon sa Himensulan.