Human sa kapin sa tuig nga kutob ra sa virtual media conference lang ang akong apilan, nakatambong na gyud kog face-to-face mediacon niadtong Sabado.
Nagpa mediacon si Aida Patana tungod kay moapil siya sa duha ka international pageants, Mrs. Tourism Ambassador sa Hulyo 7-12 ug Mrs. Universe 2021 sa Nob. 27-Dis. 5.
Kahinumdoman nga napili si Aida nga 1st runner-up sa Mrs. World 2019 didto sa Paris, France niadtong Okt. 2019.
Gipili si Aida ni Sava Takev, ang chief operating officer sa Mrs. Tourism Ambassador. Mao sab ang nahitabo sa Mrs. Universe 2021 diin ang national director sa Mrs. Universe Philippines nga si Rodel Salvador ang nipili ni Aida.
Ning duha ka bangga, mga creations sa master couturier nga si Cary Santiago ang iyang isul-ob.
* * *
Siyam na ka tuig nga nagdala og kalingawan sa Cebu ang M Talents ni Aida pinaagi sa mga artista nga iyang gidala gikan sa Manila. Kini naglangkob nila ni Vice Ganda, Zsa Zsa Padilla, Pops Fernandez, Jaya, Bamboo ug uban pa.
Nadala usab ni Aida sa Cebu aron magkonserto ang mga international artists nga sila si David Pomeranz ug Patti Austin.
Sa pagsugod pa lang sa kompaniya, sila na si Coco Martin ug Daniel Matsunaga ang mga pinasidunggang dinapit.
* * *
Sa laing bahin, nagkasikat na usab sa Cebu ug sa YouTube ang The Aida Patana Show nga naghatag og kalingawan ug sorpresa.
Karong bag-o nanghatag kinig libreng insurance gikan sa M Lhuillier.
Nagpasiugda usab kinig community pantry sa lainlaing mga barangay sa Cebu uban sa suporta nila ni Daniel Matsunaga ug Claudine Barreto.