Kinahanglang tumanon ang minimum health standards kun protocols nga gilatid sa Inter-Agency Task Force for the Management of Emerging Infectious Diseases (IATF). Dili man lisud tumanon
kining pagsul-ob sa facemask, face shield, manghunaw kanunay ug dili magpaduol kaayo sa isig-ka tawo. Sumala kang Emergency Operations Center (EOC) deputy implementer Cebu City Councilor Joel Garganera nga kadaghanan sa nagpositibo sa Covid-19 karong bag-o mao ang mga tawo nga dili magsul-ob og facemask sa gawas sa ilang balay. Importante usab nga magtinir og distansya gikan sa laing tawo. Mao nay katarungan nga uyon ko nga silotan ang mga tawo nga dili mutoman sa health protocol. Wa koy makitang katarungan niini kon dili ang pagkagahi lang gyud og ulo.
* * *
Mahinayon na gyud kuno ang away sa ring nila ni Senador Manny Pacquiao ug Errol Spence, kinsa modepensa sa iyang World Boxing Council (WBC) ug International Boxing Federation (IBF) welterweight titles. Suma ni Jun Migallen sa Superbalita Cebu nga inilog si Spence didto sa sugal sa Las Vegas. Ang muposta kang Pacquiao og $100 modaog og $350 samtang kon adto kang Spence ang $450 makabulsa lamang og $100.
Dili kini maayong balita sa mga dumadapig ni Pacman apan wala man siyay kapildihan, modaog man o kaha o mapildi, sigurado man ang iyang premyuong salapi. Mominos hinuon ang iyang ranking. Ambut og aduna bay epekto sa iyang kandidatura ang resulta sa maong boxing match apan ang siguro nga aduna na siyay ikapuno sa iyang magasto sa election. (mannyrabacal1144@gmail.com)