SUBAY sa pagbaha sa pipila ka mga dapit sa Dakbayan sa Talisay sa Huwebes sa buntag, Mayo 27, 2021 tungod sa pagbunok sa uwan, nangayo og tabang si Talisay City Mayor Samsam Gullas sa publiko nga masolusyonan ang pagbaha sa kadalanan sa syudad.
Matod ni Gullas nga usa sa dakong hagit sa Siyudad mao ang drainage system ingon man ang mga basura nga nakabara usab sa mga agianan sa tubig.
Matod niya nga bisan sa pagsugod sa iyang termino, anaa na kini nga problema hinungdan nga iyang giumol ang Aksyon Agad Team nga daling motubag sa mga panginahanglanon sa mga konstituwente ingon man ang paglimpyo sa mga drainage sa syudad.
“Upon close checking sa mga drainages, nakita gyud ang problema. Garbage. Tons and tons of garbage were found lodged in our drainages. Mostly plastic pa gyud ang gipanglabay. Despite our efforts to help mitigate flooding in Bulacao through infrastructure, flooding will still occur as long as indiscriminate atong paglabay sa basura,” matod ni Gullas.
Subay niini, gihangyo usab niya ang Department of Public Works and Highways (DPWH) ingon man ang mga contractor nga susihon ang drainage project sa kadalanan sa Bulacao.
Tungod sa namugna nga kahasol ug pagka stranded sa pipila ka mga residente ug pasahero, nangayo og dispensa si Gullas sa nahitabo.
Apan nanawagan siya sa mga residente nga tabangan ang kagamhanan nga masulbad ang problema pinaagi sa tinarong nga pagsunod sa mga lagda sa paglabay sa basura ug dili magpataka og labay sa mga plastic sa kadalanan.
“But also, I am again appealing to our constituents to help us in solving the flooding problem by not throwing your garbage indiscriminately. Masolbad ra gyud ni nato if magtinabangay ta. Let’s make it our shared responsibility,” matod ni Gullas.
Sa pagsuwat niining balita, nihubas na ang baha ug nalimpyohan na ang mga drainage gikan sa mga basura nga nibara.
Ang uwan nagsugod sa pagbunok sa lawom nang gabii sa Miyerkules sa ubang mga dapit sa Sugbo.
Nilanat kini hangtod pa nianang buntag hinungdan nga nimugna og baha sa pipila ka mga dapit sa Sugbo. (ANV)