HUMAN masusi nga positibo sa Covid-19, si Davao Oriental Governor Nelson Dayanghirang ug iyang asawa gidala ngadto sa Davao Regional Medical Center (DRMC).
Sa pamahayag, gikanayon sa kagamhanang probinsiyal sa Davao Oriental nga niadtong Huwebes, Mayo 27, nga si Dayanghirang ug asawa, Nanette, gi-admit sa DRMC subay sa rekomendasyon ni Dr. Reden Bersaldo, kinsa maoy nangulo sa Davao Oriental Provincial Task Force on Covid-19, ug Dr. Isaiah Jeremi Gampon.
"Sa adlaw pa sa Mayo 24, Lunes, nakita sa doktor nga maayo ang ilahang kondisyon mao nga wala pa girekomenda niini nga magpa-admit sila. Apan, gipamugos na gayud sa doktor nga dad-on na sila sa DRMC sa dihang migawas na ang X-ray result nila ug namatikdan nga aduna silay pulmonya nga possibleng epekto sa Covid-19," sumala sa pahayag sa kagamhanang probinsiyal.
“Kinahanglan gyud sila i-admit na kay dili na nato matag-an ang kalit nga paggrabe sa sakit nga [Covid-19] labi na nga si Governor Dayanghirang ug iyang kapikas aduna usab mga laing sakit o comorbidities, so mas maayo nga proactive atong approach kay basin unya ug mograbe lang ug kalit," pagtataw ni Bersaldo.
Ang gobernador ug iyang asawa nasusi nga positibo sa Sars-CoV-2 niadtong Mayo 25.
Niadtong Miyerkules sa gabii, naobserbahan nga ang ilang kondisyon milambo.
Gitataw ni Bersaldo nga ang ilang oxygen levels mitaas ug wa na silay kalintura. Mipailawom sab sila og x-ray tests aron nga mamonitor ang ilang pneumonia.
Samtang gisultihan ni Dayanghirang ang iyang constituents nga dili mabalaka bahin sa ilang kondisyon.
Iya sab nga gipasidan-an ang publiko nga di mokompiyansa bisan kon way molutaw nga mga sinyales ug simtomas nga dunay kalambigitan sa Covid-19.
Sa lahi nga post, ang kagamhanang probinsiyal nagpaambit og video sa magtiayon nga nakitang naa sa maayong kondisyon una mipadulong sa DRMC.