Binasi sa Deuteronomio 4:32-34, 39-40; Salmo 33; Taga-Roma 8:14-17; ug Mateo 28:16-20
Usa ka produkto nga naglarawan sa paggukod sa atong modernong panahon sa mga butang nga mopasayon mao ang kape nga “3-in-one”. Dinhi gisagol ang kape, kamay, ug gatas. Dili na mistil paliton ang tulo ka mga sagol. Buboan lang og tubig ug ang tulo ka mga lami matilawan na isip usa ka kape. Dali ra ang pagtimpla sa kape.
Tulo ka personas sa usa ka Ginuo ang Amahan, Anak, ug ang Espiritu Santo. Mahimo silang itandi sa kape bisan pag dili gayod matugkad ang misteryo sa Santisima Trinidad. Kon paandayonan ang maong kaambid, dili na mohaom sa kahulogan sa maong misteryo.
Sa kasaysayan sa Simbahan daghan nang mga butang nga gitandi sa Santisima Trinidad. Sa mga taga-Irlanda, ang maong misteryo sa Ginuo susama sa tulo ka dahon nga nagsugod sa usa ka pungango. Gitandi pod ang Santisima Trinidad sa triyanggulo kansang tulo ka mga kilid ug mga angulo susama. Gani naa say mopunting nga ang usa nga gimultiplo sa usa nga gimultiplo pod sa usa, ang resulta usa ra gihapon.
Imposibleng matugkad ang maong misteryo kay ang mga butang nga gitandi niini adunay kinutoban apan ang Ginuo walay kinutoban. Apan wala kini magpasabot nga dili na lang kita mamalandong. Unsa may kalambigitan niining maong misteryo sa atong kinabuhi? Usa niini mao nga ang Dios makaplagan nato diha sa iyang pagpakig-uban kanato sa panaw. Gani sa dihang mobiya na si Jesus miingon siya sa iyang mga sumusunod nga nagsagol ang pagtuo ug pagduhaduha: “Ako nagauban kaninyo sa tanang mga adlaw hangtod sa kataposan sa panahon.” Mahimo kini niya tungod kay nadawat ni Jesus ang “tanang gahom sa langit ug sa yuta”. Ug ang gahom nagagikan sa iyang pagkaikaduhang Persona sa Santisima Trinidad kansang ngalan pagabunyagan ang tanang kanasoran.
Matag panguros nato atong gihindumdoman ang Dios kansang gahom naggiya sa atong dalan. Nindot ang punto sa libro sa Deuteronomio. Dinhi gisaysay ni Moises ang mga katingalahang buhat sa Dios ngadto sa iyang katawhang Israel. Nangutana siya kon ang gibuhat sa Ginuo alang kanila nasinati ba usab sa ubang mga nasod. Lahi gyod ang hiniusa ug buhing Ginuo. Ang misteryo sa Santisima Trinidad wala mosukwahi sa mensahe ni Moises. Gipalagman ug gipalapdan lamang sumala sa gipadayag sa Dios.
Gipahayag sa sulat ngadto sa mga taga-Roma ang mga bunga sa pagtuo sa tulo ka Personas sa usa nga Dios nga makaplagan sa atong pang-adlaw-adlaw nga kinabuhi. Misulat si Pablo: “Ang tanang gimandoan sa Espiritu sa Dios, mga anak sa Dios. Kay ang Espiritu nga gihatag sa Dios kaninyo dili maghimo kaninyong ulipon aron mahadlok kamo; hinunoa, ang maong Espiritu maghimo kaninyo nga mga anak sa Dios. Tungod niini makasangpit na kita sa Dios sa pag-ingon, ‘Amahan ko!’”
Ang gamhanang gugma nga gipanag-ambitan sa tulo ka Personas wala magpabilin nganha sa ilaha lamang kondili midagayday na kini nganhi kanato. Gihimo na kitang mga anak nga sinagop sa Dios. Dili na kita ulipon sa sala. Nakadawat na kita og kagawasan ug gibuntog na ang atong mga kahadlok. Apan sama sa usa ka bata nga sinagop sa usa ka adunahan ug buotan kaayo nga pamilya, ang mga diwa sa maong pamilya dili mapanag-iya sa maong bata kon dili kini niya bansaybansayon ug puy-an.
Unsa may epekto kanimo inigpanguros nimo sa “Ngalan sa Amahan, ug sa Anak, ug sa Espiritu Santo”?