MOTORSIKLO sa iyang higalang sikyu ang nigiya sa bana nga ang iyang asawa ni-check-in sa usa ka motel, diin iyang naabtang pulos hubo ang duha sulod sa lawak sa Biyernes sa alas 4:50 sa hapon sa Brgy. Lawaan 2, Dakbayan sa Talisay.
Si Toni (di tinuod niyang ngan), 42, dunay usa ka anak, taga Dakbayan sa Talisay, napusasan uban sa iyang kabit nga si Luis (di tinuod nga ngan), 39, sikyu, taga Dakbayan sa Sugbo.
Ang bana nga si Charlie ( di tinuod niyang ngan), 45, sikyu sa usa ka mall sa dakbayan sa Talisay, maoy nangayog abag sa sa kapulisan.
Si Police Corporal Junel Labitad, imbestigador sa Talisay Police Station nga nahinabi sa Superbalita Cebu, nagkanayon nga mipauli siya human wa nitubag ang iyang asawa sa daghan niyang tawag sa cell phone
Matod ni Labitad nga alas 11 sa buntag sa Biyernes, naligo ang iyang asawa. Dayon ni-duty siya alas 2:00 sa hapon sa mall.
Naabtan na lang siyag alas 4 sa hapon sa pagtawag sa cell phone sa iyang asawa, wala motubag.
Tungod niini, nananghid siya sa ilang head sa security aron ulion ang ilang panimalay.
Gipangutana niya iyang anak kon asa iyang inahan, nitubag nga ganiha rang milakaw.
Nagduda na siya nga naghimo kinig milagro hinungdan nga misangko sa iyang huna-huna nga moadto sa nailang motel sa Talisay.
“Pag-abot niya, Sir, sa motel nakit-an man niya ang XRM nga motorsiklo sa iyang best friend naa sa parking lot. Nakulbaan siya. Nangayo siyag abag diri sa police station,” dugang ni Labitad.
Sa pag-abot sa mga pulis, dali silang nangayog abag sa room boy, gitultulan sila asa nga room.
“Naabtan silang duha sa kabit, puro hubo ang lawas. Naputol ilang himaya unya mirason pa gyud nga wala daw silay gibuhat. Dayon napusasan,” sumala ni Labitad
Si Charlie nitug-an sa kapulisan nga Abril, nagduda siya nga nagduwag lain ang iyang asawa.
Kay dihang nahabilin ang cell phone niini, iyang nabasahan nga dunay mga mensahe ngadto sa iyang suod nga higala.
Sumala pa niini nga sakit palandungon nga ang iyang suod nga higala mitukob sa iyang asawa.
Gani suod na kaayo sa ilang pamilya, kon mobakasyon sila sa probinsya, ila usab kining ikuyog.
Si Charlie nipadayag nga disidido siya nga mosang-at og kasong adultery batok sa iyang asawa ug concubinaga sa iyang suod nga higala. (GPL)