Kanhi sakop sa Cebu City Police Office (CCPO) patay sa ambush samtang kaubang babaye naangol alas 9 sa buntag sa Sabado, Mayo 29, 2021 sa may national highway sa Brgy. Dakit, lungsod sa Barili.
Si Police Master Sergeant Raymund Zozobrado, 40, minyo, nadestino sa Guihulngan, Negros Oriental, taga Brgy. Mambaling, dakbayan sa Sugbo, namatay diha-diha tungod sa mga samad sa kalawasan.
Naangol ang iyang kaubang babaye nga si Vanessa Go Tura, 30, taga Sitio Upper, Brgy. Mohon, Dakbayan sa Talisay.
Si Major Romeo Caacoy, Jr., hepe sa Barili Police Station nga nahinabi sa Superbalita Cebu, nagkanayon ang mga biktima gikan sa Guihulngan Negros Oriental, sakay sa barko agi sa lungsod sa Dumanjug, padulong sa Dakbayan sa Carcar.
Si Zozobrado nagmaniho sa iyang Nmax nga motorsiklo dihang girakrakan gamit ang high-powered nga armas sa wa pa mailhing mga killer nga nagsakay sa usa ka Innova, color blue nga dunay plate #8735.
Human sa pagpamanhig, ang mga killer paspas nga nibiya padulong sa dakbayan sa Carcar.
Matod pa ni Caacoy nga tag-as nga armas ang gigamit sa mga killer base sa nakuhang mga kabhang sa crime scene.
Wa pa nila masuta kon pila tanan ang mga samad ni Zozobrado ug asa naigo kay giproseso pa sa taga Scene of the Crime Operation (SOCO) 7 operatives sa pagsuwat ning taho.
“Iyang kauban misulti nga ilang gilabyan ang Innova. Pagsaylo nila, butobuto dayon wala na siya makakita sa mga suspetsado kay nahagba na man sila sa motorsiklo. Paspas kaayo ang panghitabo,” dugang ni Caacoy.
Si Tura nakaangkog mga tapsing sa kalawasan ug gidali sa pagdala sa tambalanan sa lungsod sa Barili ug gikatakdang ibalhin sa tambalanan sa dakbayan sa Sugbo.
Gisubay pa nila unsay motibo sa kremin, apan sumala ni Caacoy naka-survive si Zozobrado sa pagpang-ambush niadtong Abril 2018 sa Barangay Mambaling.
Si Zozobrado gikan sa bilar sa laing pulis sa siyudad nga gipatay, dihang siya girakrakan usab, apan wa maigo.
Nakig-alayon na sila sa kapulisan sa Guihulngan, Negros Oriental.
Si Zozobrado, kanhi nadestino sa City Intelligence Branch (CIB) sa Cebu City Police Office (CCPO) kaniadto.