Hunyo 1 na ugma. Ug ning Lunes nga hinapos sa Mayo, alegre na ang mga tunghaan sa mga tinun-an gikan sa elementarya ngadto sa kolehiyo kaniadto. Apan pag-abot sa pandemiya sa Covid-19 sa 2019, nahitabo ang wa damha nga dakong kausaban ug apektado kaayo ang school year (SY) 2020-2021.
Gipatuman ang distance o remote learning ug modular system. Nagkapakapa ang edukasyon human way tino nga pagpangandam labi na sa koneksiyon sa internet.
Karong SY 2021-2022, unsay nagpaabot sa edukasyon? Mabalik na kaha sa tradisyonal nga klase? Daghang isyu ang nitumaw.
Si Commission on Higher Education (Ched) chair Prospero de Vera III niingon nga ang pagbalik sa karaan dakong usik sa napundar nang sistema, pagtuon, ug kalamboan sa teknolohiya.
Matod ni de Vera, ang Ched nisagop na sa ‘flexible learning’ system diin kombinasyon sa digital ug non-digital technology.
Gipasabot ni de Vera nga ang tunghaan mas gawasnon sa pagpili sa ilang pamaagi subay sa ilang kapasidad sa paghatag sa kalidad nga edukasyon. Apan ang National Union of Students of the Philippines Cebu (NUSP) Cebu niinsister nga ang ‘distance learning is against the interest of the Filipino youth.”
Nagduso ang NUSP-Cebu sa hinayhinay nga pagbalik sa karaang matang sa klase nga ilang gitawag nga mas epektibo sa pagtuon ug dili mahal sa mga tinun-an. Ang Department of Education (DepEd) unang namahayag nga ang pag-abli sa klase sa elementarya ug sekondarya ning tuiga gikatakda karong Agusto 23. Gilauman nga mabalik ang face to face classes labi na sa mga dapit nga walay grabe nga transmisyon sa kaso sa Covid-19.
Hunyo na apan sa pamahayag sa mga opisyal, wala pay tino kon ang sistema ang atong sagupon sa edukasyon. Daghang maayong ideya ang mitumaw. Ikaw, unsay imong panahom? Apan kon unsa man ang sagupon sa awtoridad sa edukasyon, ato kini sagupon alang sa kahiusahan sa nasod.