PIPILA ka lugar sa siyudad sa Davao ang gibaha Dominggo sa gabii, Mayo 30, tungod sa perte kakusog nga ulan dala sa Bagyong Dante.
Sa Bangkal sa siyudad sa Davao, anaa sa 65 ka pamilya ang gihikling tungod sa baha.
Mga nagpuyo sa Bulusan ug Taal, Bangkal, Barangay Talomo Proper namakwit padung sa Our Lady of Lourdes Parish gym tungod misaka na ang tubig baha sa ilang dapit.
Samtang sa Mintal, pipila sab ka indibiduwal ang gipang-rescue human
misud na ang tubig baha sa ilang panimalay.
Nagpahimangno ang awtoridad nga pabiling igmat tungod sa padayong pag-ulan nga dala ni Dante.
Gikan alas 12 sa udto, kagahapon, Mayo 31, ang Philippine Atmospheric, Geophysical and Astronomical Services Administration (Pagasa) nagpakanaug sa Yellow Warning Level alang sa Davao Oriental ug Surigao del Sur.
Dugang niini, gilauman ang pagbaha ug landslide sa mga lugar nga apektado sa way puas nga pag-ulan.
Samtang sa Davao de Oro, pipila ka mga lungsod ang nakasinati sab og pagbaha ug landslide tungod sa pagbunok sa kusog nga ulan.
Gibutyag ni Gerry Lancerda, tigdumala sa operation section sa Municipal Disaster Risk Reduction and Management Office (DRRMO-Maco), nga nahinabi sa Superbalita Davao pinaagi sa selpon kagahapon nga gawas sa nahitabong landslide sa Barangay Panoraon sa Mawab niadtong Dominggo, Mayo 30, duna say laing landslide nga nahitabo sa mga barangay sa Panamin, Mainit ug Little Panamin sa mao gihapong lungsod.
Samtang sa Barangay Panibasan sa samang lungsod gihapon nahitabo sab ang pagbaha partikular sa Purok 4 human miapaw ang tubig sa sapa sa maong dapit.
Hinuon, sumala ni Lancerda nga gawas sa gitahong bata nga naangol sa landslide sa Barangay Panoraon, wala nay laing nangaangol ug wala say nahitabong pagpamakwit.
Samtang sa Mawab, subling midahili ang yuta sa Km 69, Barangay Tuboran alas 6:00 sa buntag kon diin tulo sa unom ka mga linya sa highway dili maagian og sakyanan kay natabunan og mga yuta. Ang maong dapit giingong sagad dunay mahitabong landslide.
Hinuon gikanayon ni Sandy Pontillian, head sa operation section sa MDRRMO–Mawab nga nahinabi sab sa Superbalita alas 10:30 sa buntag kagahapon, Mayo 31, 2021, nga usa na lang ka linya sa highway ang natabunan og yuta sanglit nagpadayon ang gihimong clearing operation kung diin lima ka mga dump truck, 2 ka mga backhoe ug bulldozer ang gipadala sa lokal nga panggamhanan sa Mawab, uban sa tabang sa kagamhanang probinsyal aron mapadali ang paghinlo sa dalan.
Sa Compostela, pipila sab ka mga residente partikular sa Purok 3, Crossing Gabi, Crossing Indang ug Purok 2, National Highway pulos sakop sa Brgy. Poblacion ang nagping-it sa kahugaw sa tubig samtang mitunob sa tubig- baha sa kadalanan.
Hinuon, sama sa ubang lungsod wala gihapoy natalang mga bakwit sa Compostela.