SECTIONS
Pampanga
Thursday, December 09, 2021
PAMPANGA

Garcia: Pikawani ning Makalaganas a Makayawang Sakit (Separated by the Pandemic)

Kapisik

“PANGKARANIWANG babai ning marangle,

asamsam Ne ing pusu Na.

Ing lugud Na para Kaya alang angganan.

King benging tinerak La king marimlang aslag

ning bulan king kasukalan ning Brindaban.

O, asne kalugud Kaya, O, asne kalugud Kaya,

O, asne kalugud Kaya, dapot saguli namu at mako Ne.

“Pangkaraniwang babai ning manyogang baka,

Menangis Ya para Kaya.

Balu nang mako ne kabukasang abak,

king tutuking aslag ning munag.

Dapot e na apatuknang ing pamaglakad ning penandit,

at tambing nang dintang ing abak.

Memulandit Ya bang akit ne ing Ginu ning Bye na,

sukat Neng apatuknang mako.”

-- Siddha, Mapilang sunis ibat king “Pangkaraniwang Babai ning Marangle” king Album a“Asna Kabanayad a Sikanan” (A Very Gentle Force)

***

King panaun ning makayawang sakit ayni, e biru ing katuwan ning pamikawani -- saguli man o malambat a panaun. Deng miyasawa pikakawani na la ning sakit o ning gubyernu uli ning kakulagan da mu naman deng facilities o ring manibala king segana-gana. Buri me mang tukyan ing asawa, pengari, kapatad o anak keng isofac e mu antita kasaguli uling dakal a bage sasalang-alang da reng talapanibala.

Makanyan man, ing masakit keng pamikawani pauli ning sakit ayni ya pin ing ala kang akarapat at e mo abanten dang pakamalan mu king bye o ikang e da malyaring banten nung ika ing mikasakit. Deng health workers ilang magbante at lilingun kareng masakit. Oneng tau la mu, agyang masipag la papagal la naman at atin la namang pigaganakan a anak, pengari, asawa o pakamalan a makarayu karela kabang magbante la’t manese karing masakit keng isofac o ospital.

Nung keng kekaban ning bye yu akasanayan yu nang e kayu mikakawaning malambat, ngeni mapapatlud ita. Sapilitan mong lakwan deng katubale mung misan man e mu pa likwan agyang pilan mung aldo at ngeni lakwan mu la o lakwan da kang e mu balu nung kapilan ka makauli o nung makauli la pa o makauli ka pa. Ing Apung Ginu mu Yang makibalu kanita.

Nung kanita, e yu man akakit ing ulaga ning pamiyabe-abe yu keng lalam ning metung a bubungan uling ita pangkaraniwan mu king aldo’ldo pamibye-bye yu. Balamu alang kapupusan ita. Mipamiru, sagakgakan mayli, mipanabug at mipanaru, misulu-sulu king nanu man lalu na nung ating kapagmasusyan ning kayaldawan ning ninu mang abe yu bale.

Makagyu na ita uling akasanayan na king migit pabanwa. Apapagtyagan yu na nung nanu mu ing malyaring gawan kilub ning pibale-bale at e yu na paniglon munta pa king lele dagat, maglibut karing malls, mangan karing pizza parlours o nanu mang pipanganan. Makagyu na ngening ikayu namung maglutu at pisulwan yu iti anting metung a pa,milya king metung a pibale-bale.

Ing pakikwanan ya pin ing kaligtasan na ning balang metung. Ing pakikwanan ya pin ing e pamikawani angga’t malyari agya mang ing pamikawani datang at datang pa mu rin king makatakdang penandit bisa ta’t ali agyang ala na ing makayawang sakit ayni.

Makanyan man, malyaring e ta mikawakawani nung itamu anting mikakalugud talasuyu Na katamu ning Apung Ginu. Mikit-ikit tamu karin king kayaryan Na bang e na mikakawani pang pasibayu.

***

Masayang kapagmasusyan king kapat apulu’t metung a banwa ning pamisanmetung salu ta, kanakung mikibale–Dr. Reyna Cristina S. Garcia. Sana mipaldan na kang lubusan at makauli na kang agad. Dakal keng manaya keka. Kaluguran da ka.

***

Dake Talabaldugan

mipasali (pangdiwa) mebigla mu o e sasaryan o babalakang pamanyali, mipasubung sinali. English - bought or purchased something unplanned or compulsively. Alimbawa king pamangamit: “Agyang ila kabud salaping tatalnan nang Oruk bigla yang mipasali inyang linabas ya ing malagung dalagang mamisaling mangamal a imalan.”

mipasalusu (pangdiwa) mipabilis, miparapal kesa kang sadyang balak a kimut o lakad pauli ning nanu mang sangkan. English - unintentionally or accidentally sped up or rush an activity for whatever reason, factor or motivation. Alimbawa king pamangamit: “Asne kakupad maglakad ning damulag inyang kabud nyamu mipasalulu kayakit na king lalakbe dang are pakakarosa deng taung ibat keng marangle at penagal na la.”

mipasari (pangdiwa) mipalabis, mipalusuk, mipatiktak, mipasagad ikwa o disnan ing kataktakan. English - unintentionally or accidentally reach the maximum or optimum, summmit or pinnacle of something. Alimbawa king pamangamit: “Inyang mumuna, e ne man pansing Isang i Isis dapot inyang linambat na lang miyayabe mipasari na kanu ing pamalsinta da king balang metung.”

mipasasa (pangdiwa) miras king kabilyan ning pamagpasasang e sasaryan dapot e naman isdingan. English - unintentionally or accidentally got into some fun that is difficult to refuse. Alimbawa king pamangamit: “Mipasasa ya keng pamagpatingangin lele ilug i Saku inya akalingwan na a dapat ya palang luslus Menila itang gatpanapun ba’nreng dakitan ing wali na.”

***

Sadyang gawi at amanu da reng Kapampangan

Sadya-sadya neng bulan ning Unyung antini asno karakal deng pakatalatag bang pakasal uli ning amanwan dang “June Bride”—agya mang e ya gawing Kapampangan dapot akasanayan ta’na anting meging sakup da reng Amerikanu king pamuklat ning milabas a dalambanwa. Deng pisamban at munisipyu kakasna la kareng bisang pakasal at pakasal namu naman. Nung nanu man ing sangkan kaniti, keraklan makabage karing pusung mipalsinta...kanu. O mekad uling kauran...uyta! Ala pa kasing airecon kanita.

King panaung iti keraklan ditak la mung bisang magkyasawa bang atukyan ing senayang “June Bride” pauli ning malino sangkan. Mekad alang binang maniglo king pamaglagad ding kasal king bulan ning Unyu.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!