NAGSUGOD na ang kisaw sa politika, ilabi na sa umaabot nga nasyonal nga eleksiyon.
Usa sa mga namatikdan ang gipaskin nga hulagway sa managsuong Bongbong ug Imee Marcos uban ni Davao City Mayor sara Duterte-Carpio nga naniudto niadtong Dominggo.
Kadaghanan sa mga Dabawenyo nagtuo nga nangandam na sila sa eleksiyon. Ug, suma pa ni Mayor Sara, naghisgot sila og politika apan wa na niya gidetalye kung unsa man ang ilang gihisgutan. Pero, daghan ang nagtuo nga basin mahitabo nga magpares sila Mayor Inday Sara (pagka-Presidente) ug kanhi Senador Bongbong (pagka-Bise Presidente) karong eleksiyon.
Sa laing kasikas sa politika, suma sa balita nga gipatik sa Superbalita Cebu, nagsabut-sabot usab ang miyembro sa Partido Demokratiko Pilipino Lakas ng Bayan (PDP Laban) ngadto kang Presidente Rodrigo Duterte nga modagan isip Bise Presidente.
Gawas sa paghangyo nga modagan isip Bise Presidente, gihatagan sab nila og gahum si Duterte nga mopili kon kinsa ang iyang buot nga modagan pagka-presidente.
Gipaagi nila ang hangyo sa usa ka resolusyon pinetsahan Mayo 31, 2021 sa unang meeting sa PDP Laban National Council sukad sa 2016 sa Montebello Villa Resort.
Ang tanang pisikal nga mitambong sa meeting ningpirma sa resolusyon samtang ang mga ning-apil pinaagi sa Zoom padad-an og kopya sa resolusyon sa ilang opisina aron makapirma.
Una nga mipirma ang vice chairman sa PDP Laban, Secretary Alfonso Cusi, acting secretary general Melvin Matibag ug vice president for international affairs Raul Lambino.
Apan kon dili mosugot si Duterte, niingon si Lambino nga mopahigayon sila og national convention alang sa mga miyembro sa PDP Laban.
Kini ipahigayon human sa ilang National Council Meeting sa Hulyo 16 ug sa ilang National Assembly sa Hulyo 17 diin mahitabo ang ilang eleksiyon sa officers.
Kon mahitabo man nga mokandidato si Pangulong Duterte sa pagka-Bise Presidente ug mokandidato si Mayor Sara pagka-Presidente, unang eleksiyon sa nasud nga magpares ang amahan ug anak nga molansad sa pinakataas nga posisyon sa nasud.
Hinuon kung dinhi sa Davao ang atong hisgutan, kanunay nga silang mag amahan ang nagpares sa milabay nga eleksiyon sa pagka-mayor ug bise-mayor.
Kon ila (mga Duterte) nahimo sa politika sa siyudad sa Davao, di sab layo sa kahigayonan nga mahitabo kini sa Pilipinas. Alegre kini, mga Ka-Super!