1 tuig bata nalubong sa yuta

DAVAO DE ORO -- Gihaya na sa balay sa paryente ang usa ka tuig nga bata nga naapil og kalubong sa ilang balay sa nahitabong landslide didto sa Barangay Panoraon, Maco alas 4:45 sa hapon niadtong Dominggo, Mayo 30.

Ang biktima giila nga mao si Renowal Alhasan nga molupyo sa nahisgutang dapit.

Sa gihimong pakighinabi sa Superbalita Davao kang Sheryl Amancia, administrative aid sa Municipal Disaster Reduction Risk and Management Office (MDRRM) sa lungsod sa Maco, gibutyag niini nga nahitabo ang insidente dihang ang biktima, kuyog ang duha pa niya ka igsuon nga pulos sab menor de edad ug apohan, tua sa sulod sa ilang balay dihang mikalit og dahili ang yuta tungod sa pagbundak sa kusog nga ulan.

Nasayran nga kilid lang sa bakilid ang ilang balay nga gipuy-an ug niadtong higayona, nahinanok og katulog ang biktima sa duyan ug nahibilin sulod sa balay sa dihang midahili ang yuta samtang ang iyang duha ka igsuon ug apohan nakadagan pagawas.

Nasayran nga naugkat gikan sa ilawom sa yuta ang biktima apan wala na kini makalahutay ug gideklarang dead on arrival sa balay tambalanan.

Ang patay'ng lawas sa biktima gihaya sa panimalay sa ilang paryente sa nahisgutan gihapon nga barangay sanglit ang ilang balay hingpit nang nagusbat sa landslide.