Grabe kaayo ang uwan nga dala sa bagyong Dante dinhi sa Sugbo bisan tuod kon wa kaayoy hangin. Nimugna kini og grabeng baha ug duna say mga landslide. Apan bisan pa niini, nalikayan ang pagkakalas sa kinabuhi sa mga Sugboanon.
Nahitabo kini tungod sa mga disaster preparedness sa kagamhanan nga niabot ngadto sa katapusang sityo sa matag barangay. Naa dayon ang preemptive nga pagpamakwit sa mga tawo sa mga dapit nga dali bahaon ug maigo sa landslide.
Kon wa pa ang mga disaster personnel sa matag barangay gibansay, maglisod ang mga local government unit (LGU).
Sa Dakbayan sa Sugbo, gipahimutang usab ang mga heavy equipment aron dali rang makatubag sa mga emerhensya panahon sa ting-uwan ug bagyo. Bisan ang mga ambulansya ug rescue personnel gibutang sa strategic areas.
Apan ang mga landslide ug baha kaniadto di ingon niani kagrabe karon. Naa man tuod, apan gamay ra. Ang kahadlukan sa mga tawo kaniadto mao ang kusog nga hangin. Apan karon, hasta ang tubig ug yuta apil na sa gikabalak-an.
Di lang global warming ang hinungdan ning nagkagrabe nga mga epekto sa bagyo. Apil na niini ang pagsulbong sa populasyon nga nakaingon sa pagkaupaw sa kabukiran. Baha ug landslides ang resulta.
Tinuod, ang kalikupan magdala og katalagman. Apan ang binuhatan sa tawo, sama sa deforestation, land development nga nakaguba sa kabukiran, pagpatakag labay sa basura ug paspas nga urbanization maoy nakapagrabe sa epekto.
Kon tutokan lang unta og tinud-anay sa kagamhanan, di lang ang pagpugong sa grabeng epekto, kon di ang pagpangitag hingpit nga kasulbaran sama sa paghaw-as sa mga tawo gikan sa mga dapit nga bahaanan ug maigo sa landslide ug ibalhin sila sa permanente ug luwas nga dapit, di na unta magbalikbalik sa pagpabakwit kada dunay bagyo ug grabeng uwan.