MAAGIAN na ang dalan nga nataboan sa midahili nga yuta didto sa Km. 69, National Highway, Tuboran, Mawab, Davao de Oro alas 2:15 sa hapon, Miyerkules, Hunyo 2, 2021.
Sa gihimong pakipaghinabi sa SunStar Superbalita kang Ruel S. Helicame, head sa Municipal Disaster Risk Reducation and Management Office (MDRRMO-Mawab), gibutyag niini nga niadtong higayona init ang panahon ug way ulan gikan pa sa buntag sa maong adlaw. Apan kalit lang midahili ang yuta ug ang bagang duot niini mitabon sa tibuok bahin sa highway.
Matud pa nga kini na ang ikaupat nga higayon ning tuiga nga dunay nahitabong landslide sa maong dapit. Una niadtong April 28, ikaduha niadtong Mayo 24, ikatulo niadtong Mayo 31.
Dugang ni Helicame nga daan nang nakitaan og liki ang bahin sa bukid sa dapit nga maoy gituohan nga hinungdan sa landslide.
Daling nag-abiso ang buhatan sa MDRRMO–Mawab pinaagi sa ilang opisyal Facebook page nga ang tanang motorista motipas og agianan sa Sawangan–Maco Provincial Road ug gilimpyohan ang highway sa mga yuta sa hiniusang puwersa sa Department of Public Works and Highway (DPWH), Provincial Engineering Office, Municipal Engineering Mawab sa Davao de Oro ug Tagum City Engineering Office sa Davao del Norte.
Tungod niini napadali ang clearing operation ug alas 4 sa hapon sa maong adlaw hingpit nang maagian ang usa ka linya sa highway.
Sa paghagpat ning balita, padayon pa ang clearing operation alas 8 sa buntag Huwebes, Hunyo 3, ug nadugangan na og lain pang usa ka linya nga maagian sa mga sakyanan. (Dexter T. Visitacion)