Recovery rate sa Cagayan de Oro padayon miubos, anaa na sa 77.17%

PADAYON ang pag-ubos sa recovery rate sa Cagayan de Oro bisan nakatala kini og 103 ka mga bag-ong nakarekober nga mga coronavirus-positive nga mga pasyente.

Ang kinatibuk-ang ihap sa mga nakarekober nga mga pasyente miabot na sa 5,818. Ang recovery rate sa dakbayan anaa na sa 77.17 percent.

Sa maong 5,818, 313 ang mga locally stranded individuals (LSIs), 124 ang mga returning overseas Filipinos (ROFs), ug 5,381 ang mga lokal nga kaso (community: 4,526; Apors: 855).

Ang hinungdan sa pag-ubos sa recovery rate sa dakbayan mao ang pagsaka sa ihap sa mga bag-ong kaso sa Covid-19. And Cagayan de Oro nakatala og 166 ka mga bag-ong kaso sa coronavirus disease (Covid-19).

Sumala ni City Health Officer Dr. Lorraine Nery, sa 166 ka mga bag-ong lokal nga kaso, 96 ang mga local index nga mga kaso, 19 ang mga lokal nga authorized persons outside residence (Apors), 46 ang mga local case with link, ug lima ang mga patay.

Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 7,539.

Sa 7,539 nga kinatibuk-ang kaso sa Covid-19 sa syudad, 440 ang mga ROFs/LSIs ug 7,099 ang mga local transmissions.

Ang Cagayan de Oro adunay 1,384 ka mga active cases, 374 niini na-admit sa Northern Mindanao Medical Center ug uban pang mga ospital sa syudad, 1,009 ang mga outpatients, ug usa ang LSI.

Ang ihap sa mga namatay sa Covid-19 sa syudad anaa na sa 337.